Almatyda Djeı Lonyń kontsertinde jalǵan bılet satqan kúdikti ustaldy

ALMATY. KAZINFORM – Almaty polıtsııasynyń kıberqylmystarǵa qarsy kúres basqarmasy 10 tamyz kúni ótken Djennıfer Lopestiń kontsertine jalǵan bılet satty dep kúdikke ilingen er adamdy ustady.

Tergeý barysynda kúdiktiniń ınternet-platformalardyń birinde habarlandyrý jarııalap, kontsertke eki jalǵan bılet satqany belgili boldy. Alaıaqtyq deregi boıynsha qylmystyq is qozǵalyp, kúdikti qamaýǵa alyndy. 

– Azamattardyń aqshasyn aldaý jolymen ıemdenýge tyrysqan barlyq adamdar anyqtalyp, jaýapkershilikke tartylatyn bolady. Osyndaı jaǵdaılarǵa tap bolmas úshin bıletterdi tek resmı saıttardan nemese senimdi kassalardan satyp alýdy qatań túrde usynamyz, - dedi Almaty qalasy kıberqylmystarǵa qarsy kúres basqarmasy bastyǵynyń orynbasary Erkebulan Qoıshybaev.

Eske salaıyq, buǵan deıin Djeı Lonyń Almatydaǵy kontserti qalaı ótkenin jazǵanbyz.