Tarazda oqýshynyń anasyna balasynyń býllıng áreketi úshin aıyppul salyndy

TARAZ. Kazinform — Taraz qalasynyń ákimshilik quqyq buzý jónindegi mamandandyrylǵan soty kámeletke tolmaǵandy jábirleý faktisi boıynsha oqýshynyń anasyn ákimshilik jaýapkershilikke tartty.  

Sot materıaldaryna sáıkes, 2025 jyldyń mamyr aıynda Taraz qalasyndaǵy jalpy bilim beretin mektepterdiń birinde oqýshy N. óz synyptasyn uryp-soǵyp, býllıng jasaǵan.

Sot otyrysynda N.-nyń zańdy ókili — anasy ulynyń áreketine ókinetinin aıtyp, mundaı jaǵdaıdyń qaıtalanýyna jol bermeıtinin túsindirdi.

Kiná is materıaldarymen, sonyń ishinde polıtsııa ınspektorynyń baıanatymen, taraptardyń jazbasha túsiniktemelerimen jáne oqıǵa ornyndaǵy beınejazbamen dáleldendi.

ÁQBtK-niń 127-2-baby 3-bóligine sáıkes, ata-analarǵa eskertý nemese 10 aılyq eseptik kórsetkish mólsherinde aıyppul salý qarastyrylǵan.

Sot quqyq buzýshylyqtyń sıpatyn, kináliniń jeke basyn, kinásin moıyndaýyn, jábirlenýshiniń keshirim berýin eskere otyryp, aıyppul mólsherin 30 paıyzǵa qysqartty.

Sot qaýlysymen N.-nyń zańdy ókili 27 myń teńge aıyppul tóleýge mindetteldi. Qaýly zańdy kúshine endi.

Aıta ketelik Oqý-aǵartý mınıstrligi Balalardyń quqyqtaryn qorǵaý komıtetiniń bas sarapshysy Albına Zalmuqanova býllıngke qarsy kúres emes, aldyn alý mańyzdy ekenin aıtqan edi.