Almatyda dúken ishinde áıelge kúsh kórsetken azamat izdestirilip jatyr
ALMATY. KAZINFORM — Áleýmettik jelilerde Almatydaǵy dúkenderdiń birinde bolǵan janjaldyń beınejazbasy tarady.
Onda er adamnyń áıelge kúsh kórsetkenin kórýge bolady. Basqa azamat oǵan arasha túsken.
Almaty qalasynyń polıtsııa departamenti atalǵan beınejazbaǵa qatysty Áýezov aýdandyq polıtsııa basqarmasy tekserý júrgizip jatqanyn habarlady. Áıeldiń jeke basy anyqtalǵan. Buǵan deıin ol bul derek boıynsha polıtsııaǵa júginbegen.
— Qazirgi ýaqytta beınejazbada kórsetilgen er adamnyń júrgen jeri anyqtalyp jatyr. Onyń áreketine quqyqtyq baǵa berilip, zańda belgilengen tártippen jaýapkershilikke tartý máselesi sheshiledi. Polıtsııa bul faktige tıisti quqyqtyq baǵa berýdi qamtamasyz etedi, — dep habarlady departamentten.
Eske salaıyq, buǵan deıin Almatydaǵy meıramhanada bolǵan janjalǵa qatysqan prokýrorǵa qatysty tekserý bastalǵanyn jazǵanbyz.
