Almatyda drıft jasaǵan kezekti júrgizýshi jazalandy
ALMATY. KAZINFORM – Almatyda «BMW» avtokóliginiń júrgizýshisi túngi ýaqytta jol erejelerin óreskel buzǵan.
Qalalyq polıtsııa departamentiniń málimetinshe, túngi saǵat 3 shamasynda ol kóshede drıft jasap, aınalasyndaǵy adamdardyń qaýipsizdigine qater tóndirip, qoǵamdyq tynyshtyqty buzǵan.
– Polıtsııa qyzmetkerleri quqyq buzýshynyń jeke basyn anyqtap, ony ustady. Júrgizýshige qatysty birden 6 ákimshilik quqyq buzýshylyq boıynsha materıaldar rásimdeldi, - dep habarlady departamentten.
Kólik arnaıy aıyppul turaǵyna qoıylǵan. Al júrgizýshi sot sheshimimen ákimshilik qamaýǵa alyndy.
Buǵan deıin de Almatyda qaýipti drıft jasaǵan júrgizýshiler ustalǵanyn jazǵanbyz.
Eske salaıyq, 2026 jyldyń 21 naýryzynda Almatyda bolǵan jol apaty qoǵamda úlken rezonans týdyrdy. Zeekr kóliginiń júrgizýshisi ál-Farabı dańǵylynyń boıymen kele jatyp, qarsy qozǵalys jolaǵyna shyǵyp ketip, Mercedes avtokóligimen soqtyǵysqan. Jol apaty saldarynan Mercedes kóliginiń júrgizýshisi men eki jolaýshysy oqıǵa ornynda qaza tapty.
Atalǵan derek boıynsha QR Qylmystyq kodeksiniń 345-baby 4-bóligi boıynsha qylmystyq is qozǵaldy. Qazir Almaty qalasynyń qylmystyq ister jónindegi mamandandyrylǵan aýdanaralyq sotynda bul is qaralyp jatyr.
