Almatyda Dostyq dańǵyly men Pýshkın kóshesin abattandyratyn merdigerler belgili boldy

ALMATY. KAZINFORM – Bıyl Almatyda Dostyq dańǵyly men Pýshkın kóshesin keshendi abattandyrý jumystary bastalady.

Aýqymda jumys 2025 jylǵa josparlanǵan. Bul týraly Almaty qalalyq qoǵamdyq keńistikterdi damytý basqarmasy Kazinform agenttigi joldaǵan saýalǵa bergen jaýabynda málimdedi. 

Jobaǵa sáıkes, Pýshkın kóshesi Raıymbek dańǵylynan Gogol kóshesine deıin keshendi abattandyrylady. Sondaı-aq Dostyq dańǵylynyń Abaı men ál-Farabıge deıingi aralyǵy qamtylady.

Memlekettik satyp alý portalynda jarııalanǵan derekke júginer bolsaq, joba jaıaý júrginshilerdiń, velosıpedshilerdiń jáne júrip-turýy shekteýli adamdardyń qajettilikterin eskere otyryp, qalalyq ınfraqurylymdy jańǵyrtýdy qamtıdy.

Pýshkın kóshesine 25 myń sharshy metrden astam jaıaý júrginshiler plıtasy tóselip, jańa asfaltbeton jol jabyndysy salynady. Kózi nashar kóretin adamdarǵa arnalǵan taktıldi taqtalar, pandýstar, baspaldaqtar, tutqalar, tireý qabyrǵalary, bıiktigi keminde 5 sm bolatyn bordıýrlar ornatylady.

Dostyq dańǵylynda keńeıtilgen jaıaý júrginshiler joly, jalpy aýdany 3630 sharshy metr velosıped joldary, jaıaý júrginshiler ótkelderi men baǵdarshamdar bolady. Jasyl jelekterdiń jalpy aýdany 13,8 myń sharshy metrden asady.

Jobaǵa tapsyrys berýshi – Almaty qalasynyń Memlekettik aktıvter basqarmasy.

Jobanyń jalpy quny qosylǵan qun salyǵysyz – 4 631 758 913,99 teńge.

Tender jeńimpazdary anyqtaldy. Dostyq dańǵylyndaǵy jumystardy «KDC Construction» jaýapkershiligi shekteýli seriktestigi júrgizedi. Joba quny– 2,14 mlrd teńge. 

Pýshkın kóshesin abattandyrýmen «Construction Group Samruk» JShS aınalysady. Oǵan 2,49 mlrd teńge bólindi.

Osyǵan deıin Almatyda Prezıdent rezıdentsııasynyń ornyndaǵy jańa saıabaqta ınjenerlik jelilerdi júrgizýge 940 mıllıon teńge bólingeni týraly jazǵan edik.