Almatyda Dinmuhamed Qonaevtyń ıdeıasy júzege aspaq
ALMATY. KAZINFORM — Almatyda N.Sats atyndaǵy orys memlekettik akademııalyq balalar men jasóspirimder teatr ǵımaratyn rekonstrýktsııalaý jumystary aıasynda kireberisine mármardan jasalǵan panno ornatylmaq.
Áýezov aýdandyq ákimdigi men óńirlik kommýnıkatsııalar qyzmeti uıymdastyrǵan baspasóz týry barysynda jýrnalıster N. Sats atyndaǵy Orys memlekettik akademııalyq balalar men jasóspirimder teatryn qaıta jańǵyrtý jumysymen tanysty.
Teatrdyń kireberisine mármardan jasalǵan panno qoıý — Dinmuhamed Qonaevtyń ıdeıasy.
Jobanyń jetekshisi Asqar Saǵyndyqovtyń aıtýynsha, jumys kezinde tarıhı ǵımarattyń mańyzdylyǵy eskerilgen. Tarıhı arhıtektýralyq elementter, onyń ishinde mozaıkamen jasalǵan barelef, baspaldaqtar men qanattar, chehoslovak lıýstralary qalpyna keltirilmek. Bul aspaly shamdar bólshektelip, qaıta qalpyna keltirý úshin jóndeýge jiberildi.
— Jobany ázirleý barysynda D.Qonaev jasaǵan jobany taýyp aldyq, onda kireberisine mármar panno ornatýdy josparlapty. Biraq 15 jyl boıy ony iske asyra almaǵan. Biz osy kontseptsııany qalpyna keltirip, tolyq júzege asyrǵaly otyrmyz, — dep atap ótti ol.
Jańartýdan keıin teatrdyń syrtqy kelbeti de, ishi de aıtarlyqtaı ózgeredi. Jertóle men tehnıkalyq qabat keńeıetindikten, ǵımarattyń jalpy aýdany 9 800 sharshy metrden 14 680 sharshy metrge deıin ulǵaıtylady. Biraq kórermenniń oryn sany 781-den 744-ke deıin qysqarady, sebebi jaıly oryndyq ornatyp, qatardyń arasyndaǵy joldy edáýir keńeıtken.
Teatr aýmaǵynda jańa Black Box formatyna saı kishi sahna ǵımaraty da salynyp jatyr. Ǵımarattyń jalpy aýdany 10 500 sharshy metr, 220 oryndyq bolady. Bul keńistik túrli formattaǵy spektaklderge beıimdelip, túrlenip otyrady. Kishi sahna negizgi ǵımaratpen jabyq ótkel arqyly baılanysady, bul tarıhı bólikti jańarǵan keńistikpen biriktiredi.
Jobanyń jalpy quny 23,9 mlrd teńge, jańa ǵımarattyń alańy 10 559 sharshy metr. Qazir jumystar 56%-ǵa, jańa sahnaǵa arnalǵan jerdegi jumys 65%-ǵa aıaqtaldy. Barlyq qurylys jáne iske qosý jumystaryn 2026 jyldyń shilde aıynda aıaqtaý josparlanyp otyr.
Eske salaıyq, buǵan deıin N.Sats atyndaǵy teatr qalaı jańaratynyn jazǵanbyz.
Bastapqyda qalpyna keltirý jobasynyń quny 21,7 mlrd teńgege baǵalanǵan bolatyn, keıin bul maqsattarǵa 24 mlrd teńge bólingeni belgili boldy.