Almatyda dinı ekstremızmdi nasıhattady degen kúdikpen 44 jastaǵy er adam ustaldy
ASTANA. KAZINFORM – Almatyda dinı ekstremızmdi nasıhattady jáne dinı alaýyzdyqty qozdyrdy degen kúdikpen 44 jastaǵy er adam ustaldy. Tergeý derekterine sáıkes, ol 2024-2025 jyldary jaqtastarynan 60 mln teńgeden astam qarajat alǵan. Bul týraly Polisia.kz habarlady.
Qazaqstan Іshki ister mınıstrliginiń málimetinshe, jedel ýákilder uzaq ýaqyt boıy kúdiktiniń zańǵa qaıshy áreketterin, onyń ishinde ınternet keńistigindegi qyzmetin anyqtap, qujattaý jumystaryn júrgizgen.
Tergeý derekterine sáıkes, er adam 2024 jyldan beri Qazaqstannan tys jerde júrip, radıkaldy ıdeıalardy taratqan. Ol Telegram messendjerindegi jabyq toptarǵa ákimshilik etip, onlaın dárister ótkizgen jáne óz jaqtastaryna ıdeologııalyq turǵyda yqpal etken. Kúdikti shetelde bolǵanyna qaramastan, onyń áreketteri quqyq qorǵaý organdarynyń turaqty baqylaýynda bolǵan.
Buǵan deıin onyń birqatar aýdıodárisi terrorızmdi nasıhattaý jáne dinı alaýyzdyqty qozdyrý belgileri boıynsha sot sheshimimen ekstremıstik materıaldar dep tanylǵan. Sondaı-aq er adamnyń sheteldik teologııalyq oqý oryndarynda dinı bilim alǵany anyqtalǵan.
ІІM málimetinshe, ol jaqtastary arasyndaǵy bedelin paıdalanyp, 2024-2025 jyldary olardan 60 mln teńgeden astam qarajat alǵan.
-11 qarashada júrgizilgen jedel-izdestirý is-sharalarynyń nátıjesinde kúdikti Almaty qalasynda ustaldy. Sonymen qatar Almaty qalasy men Jambyl oblysynda bir mezgilde tergeý áreketteri júrgizildi. Tintý barysynda ekstremıstik ıdeologııa belgileri bar dinı ádebıetter men qoljazba materıaldar tárkilendi,-delingen habarlamada.
Kúdikti ýaqytsha ustaý ızolıatoryna qamaldy. Qazirgi ýaqytta ІІM qyzmetkerleri zańǵa qaıshy áreketterdiń barlyq mán-jaıyn anyqtaý, yqtımal sybaılastary men basqa da qatysy bar adamdardy áshkereleý jumystaryn jalǵastyryp jatyr.
ІІM ekstremıstik ıdeologııany taratýǵa jáne dinı alaýyzdyqty qozdyrýǵa baǵyttalǵan áreketterdi, olardy uıymdastyrýshylardyń Qazaqstanda nemese shetelde bolýyna qaramastan, anyqtap, jolyn kesý jumystary júrgiziletinin málimdedi.
Osyǵan deıin sáýir-mamyr aılarynda terrorızm men ekstremızm úshin 13 adam sottalǵany týraly jazdyq.
Sondaı-aq Atyraýda ekstremızmge kúdikti 10 adam ustaldy.