Almatyda dızelmen júretin avtobýs satyp alýǵa tyıym salynady – Erbolat Dosaev
Almatyda dızelmen júretin avtobýs satyp alýǵa tyıym salynýy múmkin. Bul týraly qala ákimi Erbolat Dosaev aıtty, dep habarlaıdy Kazinform.
«Bıyl qalanyń avtobýs parki 1 150 ekologııalyq taza avtobýsqa jańartyldy. 2024 jyldan bastap jeke tasymaldaýshylardyń dızelmen júretin avtobýstardy satyp alýyna tyıym salý josparlanýda», – dedi E. Dosaev Ortalyq kommýnıkatsııalar qyzmetinde ótken baspasóz brıfınginde.
Sonymen birge megapolıs ákimi sońǵy 11 jylda alǵash ret 100 trolleıbýs satyp alynǵanyn atap ótti. 2024 jyly taǵy 100 danasyn satyp alý josparlanǵan. Bul trolleıbýs parkin 100% jańartýǵa múmkindik beredi.
«Almatyda metro belsendi damyp keledi. Bıyl qosymsha 3 jyljymaly quram iske qosyldy. Qozǵalys ıntervaly 5 mınýt 38 sekýndqa deıin azaıdy. Nátıjesinde metrodaǵy jolaýshylar legi 100 myń adamǵa deıin kóbeıdi. Jalpy 2023 jyl qorytyndysy boıynsha qoǵamdyq kóliktegi jolaýshylar legi táýligine 1,5 mln adamǵa deıin kóbeıdi», – deıdi spıker.
Megapolıstiń kólik baılanysyn jaqsartý úshin Buqtyrma - Qulja traktisi kólik jolaıyryǵy ashylǵan. 2024 jyly Qulja traktisi 6 jolaqqa deıin keńeıtiledi, Saın kóshesi men Abaı dańǵylyn qala shekarasyna deıin uzartý, Seıfýllın - Jansúgirov jáne Saın - Móńke bı jolaıyryqtarynyń qurylysy aıaqtalady.
«Qoǵamdyq kólikti paıdalanýdy yntalandyrý úshin 2024 jyly Almatyǵa qalanyń soltústik, batys jáne shyǵys jaǵynan kireberiste kólikke aýysyp otyrý toraptarynyń qurylysy bastalady. Oǵan qosa, kelesi jyly Raıymbek dańǵylynyń boıymen Ahrımenko kóshesinen Pýshkın kóshesine deıin uzyndyǵy 9 km BRT salynyp, iske qosylady, 2025 jyly Ahrımenko kóshesinen Abaı kóshesi arasynda taǵy 8 km salynady», – dep tolyqtyrdy E. Dosaev.
