Almatyda «dıplomyn» jyrtqan túlek jazalandy
ALMATY. KAZINFORM — Almatyda áleýmettik jelide dıplomyn jyrtyp jatqandaı kóringen vıdeo jarııalaǵan túlek ákimshilik jaýapkershilikke tartyldy.
Almaty polıtsııasynyń málimetinshe, TikTok platformasyna monıtorıng júrgizý barysynda qoǵamda keń talqylanǵan vıdeo anyqtalǵan. Tekserý kezinde Almatydaǵy jekemenshik kolledjderdiń biriniń túlegi dıplom tabystaý rásiminen keıin joǵary bilimdi rastaıtyn qujattyń muqabasyna uqsas zatty kópshilik aldynda jyrtyp jatqan vıdeony jarııalaǵany belgili boldy.
Alaıda tekserý nátıjesinde túlektiń dıplomynyń túpnusqasy, oǵan qosa beriletin qosymshasy jáne oqý orny tapsyrǵan túpnusqa muqabasy búlinbegeni anyqtaldy. Vıdeoda aldyn ala daıyndalǵan dıplom muqabasynyń kóshirmesi paıdalanylǵan.
— Soǵan qaramastan jarııalanǵan vıdeo áleýmettik jelilerde keń tarap, qoǵamda túrli pikir týǵyzyp, polıtsııanyń tekserý júrgizýine negiz bolǵan. Tekserý qorytyndysy boıynsha beınejazba avtory Qazaqstan Respýblıkasy Ákimshilik quqyq buzýshylyq týraly kodekstiń 456-2-babynyń 3-1-bóligi boıynsha ákimshilik jaýapkershilikke tartyldy, — dep habarlady polıtsııa.
Eske salaıyq, buǵan deıin Abaı oblysynyń turǵyny 600 myń teńgege dáriger dıplomyn satyp almaq bolǵanyn habarlaǵan edik.
