Almatyda detektıv jáne shytyrman oqıǵalar keńesin qurý týraly qarar qabyldandy
Almatyda qazaq ádebıetiniń kórnekti ókili, jazýshy, jýrnalıst Kemel Toqaevtyń 100 jyldyǵyna oraı uıymdastyrylǵan «Detektıv janrynyń darabozy» atty halyqaralyq ǵylymı-tájirıbelik konferentsııa óz máresine jetti, dep habarlaıdy QazAqparat tilshisi.
Konferentsııa jumysyna TÚRІKSOI uıymynyń bas hatshysy Sultan Raev, Ózbekstan Jazýshylar odaǵynyń múshesi Mınhojıddın Hodjımatov, Qyrǵyzstan Jazýshylar odaǵynyń Tóraǵasy Nurlan Qalybekov, Reseı ǵylymynyń eńbek sińirgen qaıratkeri, professor, detektıv janrynyń áıgili jazýshysy Dmıtrıı Shestakov, tanymal otandyq jazýshylar Dýlat Isabekov, Ahmetjan Ashırı, Qulbek Ergóbek, Qanseıit Ábdezuly, Nurlan Orazalın, Smaǵul Elýbaı, Jańǵara Dádebev jáne taǵy basqa qalamgerler qatysty.
Alqaly jıyn barysynda 20-dan astam otandyq jáne sheteldik spıkerler baıandama jasady.
Sarapshylar men ǵalymdar sanaly ǵumyryn sóz ónerine arnaǵan, ádebıetimizdiń altyn qoryn klassıkalyq shyǵarmalarmen baıytqan árbir tulǵaǵa taǵzym etý, olardyń shyǵarmashylyǵyn zertteý men zerdeleý, qalyń jurtshylyqqa nasıhattaý azamattyq mindet ekenin atap ótti.
«Ult ádebıetin toqyraýǵa ushyratpaı, meılinshe, damytyp, jańa bıikke kóterý, jańa kókjıekke shyǵarý – qalam ustaǵan árbir jazýshynyń abyroıly mindeti, asyl paryzy.Qazaq ádebıetindegi detektıv janrynyń negizin qalap, tyńǵa túren salǵan jazýshy – Kemel Toqaevtyń shyǵarmalary áldeqashan halyqtyq qazynaǵa aınalǵan. Kemel Toqaev shyǵarmashylyǵy áli de tereń zertteýdi, zerdeleýdi qajet etetini sózsiz. Shyǵarmalary urpaq almasqan saıyn qaıyra basylyp kele jatqan jazýshynyń qalamynan týǵan týyndylar aldaǵy ýaqytta da ádebıet zertteýshi ǵalymdardyń ǵylymı jumystaryna negiz bola bermek»,- dedi Qazaqstan Jazýshylar odaǵy basqarma tóraǵasy Mereke Qulkenov.
Talqylaý qorytyndysy boıynsha konferentsııaǵa qatysýshylar, Kemel Toqaev negizin qalaǵan qazaq detektıv janrynyń ári qaraı damýyna jol ashý, osy janrda qalam tartyp júrgen jazýshylarǵa jaǵdaı jasaý týraly qarar qabyldady.
«Qazaqstan Jazýshylar odaǵy detektıv jáne shytyrman oqıǵalar keńesin quryp, onyń jańa baǵdarlamalaryn jasaıdy. Bul bastamany Qazaqstan Jazýshylar odaǵy basqarmasy tıisti mekemelermen birge atqarýdy óz mindetine alady. Kemel Toqaev atyndaǵy qaıyrymdylyq qory men Jazýshylar odaǵy birigip uıymdastyrǵan «Kemel qalamger» – ádebı shyǵarmashylyq báıgesi bıyl óte jaqsy nátıje berdi. Endi osy ıgi bastamany jyl saıyn ótkizip turýdy qolǵa alamyz. Ult ádebıetine ólsheýsiz úles qosqan kórnekti tulǵalarymyzdyń rýhy men máńgi ólmes muralary halqymyzben birge jasaı bersin»,- dedi Mereke Qulkenov.
