Almatyda demalystaǵy jármeńkelerge aptasyna 50 myńǵa jýyq adam keledi

ASTANA. KAZINFORM — Berekeli kúzde Almaty men Almaty oblysynyń fermerleri demalys kúngi jármeńkelerde balǵyn ónimder usynyp keledi, dep habarlaıdy Almaty qalasynyń ákimdigi.

Sońǵy ýaqytta jármeńkelerge kelýshiler sany 10% artyp, búginde aptasyna 50 myń adamǵa deıin jetip otyr.

Buǵan Jetisý aýdanynda ashylǵan jańa jármeńke de yqpal etti. Qazir mundaı saýda oryndary Almaly, Bostandyq, Áýezov, Medeý jáne Jetisý aýdandarynda turaqty túrde uıymdastyrylyp keledi. Іs-sharany «Almaty» áleýmettik-kásipkerlik korporatsııasy uıymdastyrǵan.

— Jyl basynan beri jármeńkelerge qatysatyn fermerler men aýyl sharýashylyǵy óndirýshileriniń sany 10% kóbeıip, búginde 330 kásip ıesine jetti. Olar tutynýshylarǵa myńnan astam túrli taýar usynady. Barlyq ónim deldalsyz, ıaǵnı tikeleı óndirýshiler men óńdeý kásiporyndarynan jetkiziledi. Bul óz kezeginde baǵanyń naryqtaǵy deńgeıden tómen bolýyna septigin tızigip otyr, — delingen ákimdik taratqan aqparatta.

Turǵyndar suranysynyń artýyna baılanysty «Almaty» ÁKK kelesi aptada Almaly aýdanynda jańa jármeńke ashýdy josparlap otyr. Ótetin orny jaıly qosymsha aqparat keıinirek habarlanady.

Jármeńkeler ár senbi jáne jeksenbi kúnderi saǵat 09:00–den 18:00–ge deıin myna mekenjaılarda ótedi:

• Almaly aýdany — Masanshy kóshesi, Gogol jáne Áıteke bı kósheleriniń arasy;
• Bostandyq aýdany — Qazaqfılm shaǵynaýdany, Isınalıev kóshesi;
• Áýezov aýdany — Ótegen batyr kóshesi, Abaı dańǵylynan tómen;
• Medeý aýdany — Mendyqulov býlvary, Bekturov kóshesiniń qıylysy;
• Jetisý aýdany — Qulager shaǵynaýdany, Serikov kóshesi, 2-úı.

Jańa ónimder jármeńkelerde ǵana emes, qaladaǵy iri saýda jelilerinde de qoljetimdi baǵamen satylady. «Bereke Fest» respýblıkalyq aktsııasy aıasynda otandyq óndirýshilerge arnaıy saýda aımaqtary bólindi. Bul shara ónimderdi tómendetilgen baǵamen satýǵa, otandyq óndiristi qoldaýǵa jáne áleýmettik mańyzy bar azyq-túlik taýarlarynyń baǵasyn turaqtandyrýǵa múmkindik beredi.

Aktsııa aıasynda Almaty qalasynyń Kásipkerlik jáne ınvestıtsııalar basqarmasy, «Almaty» ÁKK jáne Magnum, Small, Toimart saýda jelileri arasynda yntymaqtastyq týraly memorandýmdarǵa qol qoıyldy. Qujattar boıynsha áleýmettik mańyzy bar azyq-túlik taýarlaryna saýda ústemesi 10 paıyzdan aspaıdy.

Aıta keteıik, «Bereke Fest» aktsııasy bıyl qazan aıynyń sońyna deıin jalǵasady.

Osyǵan deıin elimizde jyl sońyna deıin 1700 jármeńke ótetini belgili boldy.