Almatyda demalys kúngi jármeńkeler zamanaýı formatqa kóshedi
ALMATY. KAZINFORM — Almatyda demalys kúnderi ótetin jármeńkelerdi zamanaýı formatqa kóshirý arqyly jańǵyrtý jumystary bastalady.
Almaty qalasy ákiminiń orynbasary Oljas Smaǵulovtyń aıtýynsha, bul jumystar Bostandyq jáne Áýezov aýdandarynda qolǵa alynady. Joba aıasynda ınfraqurylymdy jańartý, sondaı-aq satyp alýshylar men kásipkerler úshin qolaıly jaǵdaı jasaý kózdelip otyr.
— Bıyl myńnan astam jármeńke ótkizý josparlanǵan. Bul byltyrǵy jylmen salystyrǵanda 2,5 esege kóp. Fermerler men otandyq taýar óndirýshilerdiń ónimderi deldalsyz, tikeleı jetkiziletindikten, taýarlar ortasha naryqtyq baǵadan 5-15%-ǵa tómen baǵamen usynylady, — dedi ol.
Oljas Smaǵulov jańǵyrtý jumystary aıasynda jármeńke alańdary qalanyń dızaın-kodyna sáıkes biryńǵaı sáýlettik stılde rásimdeletinin atap ótti. Jobada jabyq jáne ashyq saýda pavılondary, múmkindigi shekteýli azamattarǵa beıimdelgen sanıtarlyq torap, avtoturaq, aıaldama keshenderi, qoǵamdyq tamaqtaný oryndary men kóriktendirilgen qoǵamdyq keńistikter qarastyrylǵan.
Pılottyq joba retinde «Qazaqfılm» shaǵyn aýdanyndaǵy jármeńke alańy tańdaldy. Bul aýmaqta shamamen 100 saýda orny ornalastyrylyp, saýda pavılondary jańartylyp, aınalasy kórkeıtiledi. Jumystardy bıylǵy mamyr aıynda aıaqtaý josparlanyp otyr.
110 saýda ornyna eseptelgen ekinshi jármeńke alańy Ótegen batyr kóshesi boıynda (Abaı dańǵylynyń qıylysy mańynda) ornalasady. Bul joba da mamyr aıynda iske qosylmaq.
— Jobalar jeke ınvestıtsııa esebinen júzege asyrylady. Sonymen qatar jármeńkelerdiń áleýmettik sıpaty saqtalady: kásipkerler men jergilikti óndirýshiler úshin qolaıly sharttar usynylady, qazirgi qatysýshylarǵa saýda oryndary bekitiledi, — dep túsindirdi ákim orynbasary.
Eske salaıyq, Almaty ákimdigi demalys kúnderi ótetin jármeńkeler jelisin keńeıtýdi josparlap otyrǵanyn jazǵanbyz.
