Almatyda demalys kúnderi 4 kóshede ýaqytsha jol jabylady

LRT jobasyn iske asyrý aıasynda Abylaı han dańǵylynyń bir bóliginde kólik qozǵalysyna ýaqytsha shekteý engiziledi. 10 qazan saǵat 08:00–den 11 qazan saǵat 20:00–ge deıin Raıymbek dańǵylynan Mámetova kóshesi jabylady.

Brýsılovskıı kóshesiniń bir bóliginde jol jabyny tóselmek. Sol úshin 10 qazan saǵat 22:00–den 11 qazan saǵat 07:00–ge deıin Tóle bı kóshesinen Raıymbek dańǵylyna deıingi aýmaqta jol tolyqtaı jabylady.

Al ınjenerlik jelilerdi qaıta ornalastyrý jumystaryna baılanysty Alataý dańǵylynyń bir bóligi jabylady. Atap aıtqanda, 10-11 qazan saǵat 08:00–den 20:00–ge deıin Raıymbek dańǵylynan ońtústikke qaraı ornalasqan Alataý dańǵylynyń jergilikti aýmaǵynda kólik qozǵalysy kezekpen uıymdastyrylady.

Sonymen qatar Saın kóshesin uzartý josparlanǵan. 10 qazan saǵat 07:00–den 12 qazan saǵat 23:00–ge deıin Saın kóshesiniń batys jaǵymen Rysqulov dańǵylynan Móńke bı kóshesine deıingi aýmaqta, sondaı-aq Sháripov kóshesinde kólik qozǵalysy jabylady.

— Jóndeý jumystary júrgiziletin ýchaskede eskertý belgileri ornatylady. Jol baǵytyn aldyn ala josparlaýdy suraımyz. Jóndeý jumystarynyń merzimi aýa raıy jaǵdaıyna jáne jóndeý jumystarynyń tehnologııalyq úderisine áser etetin ózge de faktorlarǵa baılanysty ózgertilýi múmkin, — dep túsindirdi ákimdik.

Eske salaıyq, Almatyda elektr jelilerin jóndeýge baılanysty qalanyń ortalyǵyndaǵy kóshe ýaqytsha jabylatyny eskertildi.