Almatyda daý týdyrǵan Sátbaev eskertkishi qaıda kóshiriledi
ALMATY. KAZINFORM - Almatyda Qanysh Sátbaev eskertkishin kóshirý máselesi qoǵamda qyzý talqylanyp jatyr. Áleýmettik jelilerde bul bastamaǵa qarsy pikir kóp aıtylyp, turǵyndar tarıhı tulǵanyń eskertkishin qazirgi ornynan jyljytýdy «qurmetsizdik» dep otyr.
Jelide jarııalanǵan jazbalarda almatylyqtar:
• Alaqandaı tar jerge qaıdaǵy teatr – Qanysh Sátbaevty mazaq qylǵandaryń ba?!
• Uly qazaqtyń eskertkishin qozǵaýǵa bolmaıdy! Kóshirgen soń qundylyǵy joǵalady, tarıhı nysandy tıispeı saqtap qalýymyz kerek»
• «Amfıteatr salamyz degen syltaýmen tarıhty yǵystyrý durys emes» degen pikir jazyp jatyr.
Keıbir qoldanýshylar tipti bul sheshimge qarsy kóshege shyǵyp, narazylyq bildiretinin de jazǵan.
Almatynyń qoǵamdyq keńistikterdi damytý basqarmasy buǵan qatysty Kazinform.kz tilshisine resmı túsinik berdi.
Vedomstvonyń málimetinshe, Sátbaev eskertkishi buzylmaıdy, tek Geologtar alleıasynyń aýmaǵynda 50 metr jer ońtústik-batysqa – Qanysh Sátbaev atyndaǵy qazaq ulttyq tehnıkalyq zertteý ýnıversıteti korpýsynyń bas kireberisine aýystyrylady.
Basqarma eskertkishti kóshirý máselesi aldyn ala mamandandyrylǵan uıymdy tarta otyryp qarastyrylǵanyn málimdedi.
– Bul – Qazaqstan Respýblıkasy Mádenıet jáne sport mınıstrligi bergen №22004987 lıtsenzııasyna (15.03.2022 j.) jáne Qazaqstan Respýblıkasy Bilim jáne ǵylym mınıstrligi bergen ǵylymı jáne ǵylymı-tehnıkalyq qyzmet sýbektisi retinde №00282 akkredıtatsııa kýáligine ıe «Kúmbez» mamandandyrylǵan jobalaý-restavratsııalyq fırmasy JShS. Atalǵan uıym mamandary júrgizgen zertteý men saraptama nátıjesinde eskertkishti Geologtar alleıasy shegindegi jańa orynǵa kóshirý usynyldy. Bul sheshim eskertkishtiń jańartylǵan qoǵamdyq keńistik arhıtektýralyq-kompozıtsııalyq sheshimine áserli kirigýin, ǵylymı jáne bilim berý ortasy úshin sımvoldyq mánin aıqyndaýdy jáne mádenı mura nysanynyń tıisti saqtalýyn qamtamasyz etedi, - delingen habarlamada.
Bosaıtyn jerde ashyq aspan astyndaǵy amfıteatr salynady, ol stýdentter men qala turǵyndaryna arnalǵan mádenı jáne ǵylymı is-sharalarǵa arnalady.
– Ýnıversıtettiń resmı ótinishine sáıkes bosaıtyn jerde túrli aýqymdaǵy is-sharalardy – ǵylymı konferentsııalardan bastap mádenı jáne stýdenttik kezdesýlerge deıin ótkizýge arnalǵan ashyq aspan astyndaǵy amfıteatr salý kózdelgen. Ol alleıanyń abattandyrylǵan aýmaǵyna biriktirilip, stýdentter, ǵalymdar jáne qala turǵyndary úshin mańyzdy tartylys núktesine aınalady, - delingen resmı jaýapta.
Joba boıynsha qurylys-montaj jumystary bastalyp ta ketken.
– Qazirgi ýaqytta jobaǵa sáıkes qoldanystaǵy tas tóseýishter men kishi sáýlettik formalardy bólshekteý jumystary júrgizilip jatyr. Barlyq is-shara zańnamaǵa sáıkes júzege asyrylady jáne qalalyq ortanyń sapasyn jaqsartýǵa, mádenı-tarıhı kelbetin damytýǵa baǵyttalǵan. Sańyraýqulaq pishinindegi kóleńkeli oryndardyń ornyna Amfıteatr ornatylady, - dep habarlady basqarmadan.
Almatynyń qoǵamdyq keńistikterdi damytý basqarmasy ákimdik eskertkishtiń jańa orynǵa kóshýi onyń tarıhı-mádenı mánin saqtap, kerisinshe kórnekiligin arttyrady dep otyr.
– Jańa orynda eskertkish kórneki qabyldaý men qoǵamdyq nazarǵa anaǵurlym qoljetimdi bolady. Bul onyń mańyzyn aıqyndap, tarıhı-mádenı qundylyǵyn saqtaýǵa múmkindik beredi. Al qazirgi ornynda eskertkishtiń kórnekiligi shektelip, qorshaǵan ortanyń ishinde kózge túspeı qalyp, óziniń qaladaǵy sımvoldyq qyzmetin tolyq atqara almaı otyr. Bul onyń mán-mańyzyn tómendetip jáne qoǵamdyq sanada tarıhı rólin álsiretedi, - delingen jaýapta.
Osyǵan deıin Almaty men oblys arasyndaǵy mańyzdy avtojol keńeıtilip jatqany týraly jazdyq.