Almatyda daý bolǵan oblystyq mektep-ınternat jóndelip jatyr: balalar qaıda bilim alady
ALMATY. KAZINFORM - Jóndeý jumystary 3 jylǵa toqtap qalǵan I.Núsipbaev atyndaǵy mektep-ınternatynda jumystar qaıta jandandy.
Almatynyń Medeý aýdanynda ornalasqan, biraq oblystyq bilim basqarmasyna qarasty I.Núsipbaev atyndaǵy mektep-ınternatynda 170 balanyń aýyr jaǵdaıda ómir súrip jatqanyn Balalar ombýdsmeni Dınara Zákıeva jyl basynda aıtty.
Keıin oqý ordasy Qonaevqa kóshirilmek boldy. Alaıda ata-analar men oqýshylar qarsylyǵynan keıin ınternatta qaıtadan jóndeý jumystary jandanatyn boldy.
Mekteptiń qazirgi jaı-kúıin jáne mundaǵy balalardyń jańa oqý jylynda bilimin qaıda jalǵastyratynyn anyqtaý úshin jaýapty vedomstvoǵa saýal joldadyq.
Almaty oblysy bilim basqarmasynyń jaýabyna sáıkes, qazirgi ýaqytta mektep-ınternattyń jatyn korpýsynda kúrdeli jóndeý jumystary júrgizilip jatyr. Jobalaý-smetalyq qujattama negizinde kúrdeli jóndeý jumystaryna 979,7 mln teńge bólingen. Merdiger - «RDM stroı» JShS.
- Jóndeý jumystary kelisimshartqa sáıkes 2025 jyldyń 28 jeltoqsanynda aıaqtalýy tıis, - delingen basqarma jaýabynda.
Qazirgi ýaqytta I.Núsipbaev atyndaǵy mektep-ınternatynda 174 oqýshy jáne 50 muǵalim, 25 qyzmetker bar. Vedomstvo tálimgerler jóndeý jumystary kezinde óz oqý ǵımaratynda bilim alýdy jalǵastyratynyn málimdedi.
- Basqa mekemege ýaqytsha aýystyrýǵa mektep ákimshiligi, ata-analar qarsylyq bildirýine baılanysty aýystyrylǵan joq, - dep túsindirdi vedomstvo.
Úsh jyl buryn jóndeý jumystary nelikten aıaqtalmady
Oblystyq bilim basqarmasy I.Núsipbaev atyndaǵy mektep-ınternatynyń kúrdeli jóndeý jumystaryna qarajat 2022 jyly bólingenin atap ótti. Memlekettik satyp alý konkýrsymen kúrdeli jóndeý jumystaryn «Gradstroıservıs» JShS jeńip alyp, Qarasaı aýdandyq bilim bólimimen kelisimshart jasasqan. Sol jyly jumystardyń 50 paıyzyn oryndaǵan.
- Kelisimshartqa sáıkes 2023 jyldyń 22 qańtarynda kúrdeli jóndeý jumystary aıaqtalýy qajet bolǵan. Alaıda merdiger óz mindetterin ýaqtyly oryndamady. Qarasaı aýdandyq bilim bólimi sotqa shaǵym berip, 2024 jylǵy 27 naýryzda sot sheshimimen merdigerdi josyqsyz qatysýshy tizimine engizdi. Kúrdeli jóndeý jumystarynyń qoldanylmaǵan qarajaty 2023-2024 jyldary memlekettik bıýdjetke keri qaıtaryldy, - dep habarlady basqarmadan.
Eske salaıyq, buǵan deıin Almatyda ornalasqan oblystyq Balalar úıi Qonaev qalasyna kóshirilmek boldy. Alaıda mekemeniń tárbıelenýshileri oǵan narazylyq bildirdi.
Prezıdent tapsyrmasymen «Baǵanashyl» balalar úıi Almatydan Qonaevqa kóshirilmeıtin boldy. Onda jóndeý jumystary júrgizilip, mekeme Almaty qalasyna beriledi.