Almatyda daryndy balalarǵa arnalǵan bilim berý ortalyǵy salynady

ASTANA. KAZINFORM – Memleket basshysynyń tapsyrmasy aıasynda elimizde taǵy bir iri bilim berý jobasy iske qosylady. Almaty qalasynda zamanaýı úlgidegi «Úrker» bilim berý ortalyǵy boı kótermek. Bul týraly QR Oqý-aǵartý mınıstrligi Orta bilim komıtetiniń tóraǵasy Qanybek Jumashev málim etti.

Komıtet tóraǵasynyń aıtýynsha, jobanyń basty maqsaty – daryndy oqýshylar men jastarǵa teń múmkindik berý, sondaı-aq olardyń ǵylym, óner, tehnologııa jáne kásipkerlik salalaryndaǵy qabiletterin damyta otyryp, Qazaqstannyń ıntellektýaldyq, mádenı jáne ınnovatsııalyq órkendeýine serpin beretin jańa kóshbasshylar býynyn qalyptastyrý.

– «Úrker» ortalyǵy – daryndy balalarǵa arnalǵan bilim berý júıesiniń jańa kezeńi bolmaq. Munda oqýshylar halyqaralyq standarttarǵa saı bilim berý baǵdarlamalary arqyly ǵylymı-zertteý jáne shyǵarmashylyq áleýetin damyta alady, – dedi maman. 

Atalǵan ortalyq bazasynda matematıka, fızıka, hımııa, bıologııa, ınformatıka baǵyttarynda ǵylymı mektepter men zerthanalar, startap-ınkýbatorlar, robototehnıka, jasandy ıntellekt, bıotehnologııa syndy zamanaýı salalar boıynsha iri halyqaralyq kompanııalarmen seriktestik jobalar júzege asady. Sonymen qatar mýzyka, beıneleý óneri, kıno, teatr men ulttyq ónerdi damytýǵa da jan-jaqty jaǵdaı jasalmaq.

– Bul – tek bilim ordasy ǵana emes, elimizdiń bolashaǵyna qyzmet etetin ınnovatsııalyq, kreatıvti oılaıtyn jańa býyndy qalyptastyrý alańy, – dedi Qanybek Jumashev.

Buǵan deıin daryndy jastarǵa «Bolashaq» arqyly bakalavr deńgeıinde bilim alýǵa ruqsat beriletinin jazǵanbyz.