Almatyda dárigerler júkti áıeldiń sábıine zııan keltirmeı júrekke ota jasady

ALMATY. KAZINFORM — Almatyda alǵash ret júkti áıelge júrekke rentgen sáýlesin qoldanbaı endovaskýlıarlyq ota jasaldy. Biregeı otany Qalalyq kardıologııa ortalyǵynyń dárigerleri Astanadaǵy UMC júrek ortalyǵynyń mamandarymen birlesip ótkizdi.

Densaýlyq saqtaý mınıstrliginiń habarlaýynsha, júktiliktiń 23-aptasynda júrgen áıelge jasalǵan. Dárigerler týa bitken júrek aqaýyn ehokardıografııanyń kómegimen, rentgensiz jáne jergilikti jansyzdandyrýmen emdedi. Bul ana men uryqqa rentgen sáýlesiniń áserin tolyqtaı boldyrmady.

Naýqas tuńǵysh sábıin kútip júrgen jáne tirkelgen emhanasynda kardıologtyń turaqty baqylaýynda bolǵan. Alaıda júktilik merzimi ulǵaıǵan saıyn júrek-qan tamyrlaryna túsetin júktemeniń artýyna baılanysty jaǵdaıy nasharlap, ota qajet bolǵan.

Operatsııalyq brıgadanyń quramynda UMC júrek ortalyǵynyń ınterventsııalyq kardıology Erik Otarbaev, sondaı-aq Qalalyq kardıologııa ortalyǵynyń mamandary — Orazbek Sahov pen Baýyrjan Aıpov boldy.

— Operatsııanyń basty ereksheligi rentgen sáýlelerin qoldanbaı ýltradybystyq baqylaýmen aralasý boldy. Qalypty tájirıbede mundaı operatsııalar júktilik kezinde uryqqa yqtımal qaýip tóndiretin rentgendik baqylaýmen jasalady. Ýltradybystyq navıgatsııany qoldaný radıatsııalyq júktemeni tolyǵymen alyp tastaýǵa jáne ana úshin de, bolashaq bala úshin de qaýipsizdikti qamtamasyz etýge múmkindik berdi, - delingen habarlamada.

Vedomstvonyń málimetinshe, qazirgi ýaqytta naýqastyń jaǵdaıy turaqty. Ana men uryqtyń ómiri men densaýlyǵyna qaýip joq.

Eske salaıyq, buǵan deıin Soltústik Qazaqstan oblysynda dárigerler salmaǵy nebary 1,6 keli shaqalaqqa ota jasap, aman alyp qalǵanyn jazǵanbyz.