Almatyda dárigerler salmaǵy 679 gramm náresteni aman alyp qaldy
ASTANA. KAZINFORM — Reanımatsııada 70 kún, ókpeni jasandy jeldetý apparatynda 43 kún, SIPAP ádisimen tynys alýdy qoldaý kezinde taǵy 25 kún ótkizgen sábı aqyry anasymen qaýyshty, dep habarlaıdy Densaýlyq saqtaý mınıstrliginiń baspasóz qyzmeti.
Almaty qalasyndaǵy № 2 qalalyq perınataldyq ortalyqtyń mamandary salmaǵy nebári 679 gramm bolyp týǵan shala náresteni aman alyp qaldy.
Ul bala 2026 jylǵy 8 tamyzda júktiliktiń 26 aptasy men 6 kúninde dúnıege kelgen. Anasy shuǵyl túrde perınataldyq ortalyqqa jetkizilgen. Júktilik kezindegi asqynýlarǵa baılanysty medıtsınalyq kórsetilimder boıynsha kesar tiligi jasalǵan.
— Ómiriniń alǵashqy mınýttarynan bastap nárestege qarqyndy medıtsınalyq kómek qajet boldy. Osy ýaqyt boıy medıtsına mamandary onyń jaǵdaıyn táýlik boıy baqylap, qajetti em-dom júrgizdi. Ómir úshin uzaqqa sozylǵan kúresten keıin kópten kútken sát týdy: sábı reanımatsııadan shyǵyp, anasynyń qasyna jatqyzyldy. Qazir náresteniń týǵanyna 75 kún boldy. Salmaǵy 1 800 gramǵa jetti. Úshinshi kún qatarynan anasymen birge palatada jatyr, — delingen habarlamada.
Bul kórsetkishterdiń artynda dárigerlerdiń tynymsyz eńbegi, táýlik boıǵy kútimi jáne kún saıyn shırap, nyǵaıyp kele jatqan kishkentaı ómir tur.
Qazaqstan Ortalyq Azııa elderiniń arasynda jańa týǵan náresteler óliminiń eń tómen kórsetkishine qol jetkizdi. Tiri týǵan árbir 1 000 nárestege shaqqanda ólim kórsetkishi 3 jaǵdaıdy quraıdy.
Bul — perınataldyq kómekti júıeli damytý, zamanaýı tehnologııalardy engizý jáne ana men balaǵa medıtsınalyq qyzmet kórsetý júıesin jetildirý nátıjesi.
Buǵan deıin Almatyda dárigerler besinshi qabattan qulaǵan 4 jasar balany aman alyp qalǵanyn jazdyq.
