Almatyda dárigerler naýqastyń tómengi jaq súıegin endoprotezben almastyrdy
ALMATY. KAZINFORM – Almatyda samaı-tómengi jaq býynyn (STJB) aýystyrý otasyn tek Qalalyq balalarǵa shuǵyl medıtsınalyq kómek kórsetý ortalyǵynyń dárigerleri jasaıdy.
Bul – óte kúrdeli protsedýra, óıtkeni STJB – bet qańqasynyń negizgi túıin núktesi. Ol tómengi jaqtyń qozǵalysyn úılestirip, shaınaý, sóıleý men mımıka úshin jaýap beredi, tister men bulshyqetter arasyndaǵy júktemeni bóledi ári amortızatordyń qyzmetin atqarady. Býyndy aýystyrý úshin dárigerlerge jaq súıegin 3D-modeldeý jumystaryn jasap, anatomııalyq turǵydan dál keletin materıal daıyndaýǵa týra keldi.
17 jastaǵy jasóspirim 11 jyl boıy tómengi jaq súıeginiń deformatsııasynan zardap shegip kelgen. Uzaq ýaqyt ishinde onyń tistemi (prıkýs) durys emes damyǵan. Al turaqty syzdaǵan aýyrsyný aýzyn tolyq ashýǵa jáne taǵamdy qalypty shaınaýǵa múmkindik bermegen. Oń jaq bóligi durys damyp jatqanymen, sol jaǵynda aıqyn aqaý baıqalǵan. Iek solǵa qaraı yǵysqandyqtan, bet pishini asımmetrııaly kórinip, jasóspirimniń qurdastarymen qarym-qatynasynda psıhologııalyq jaısyzdyq týdyrǵan.
Munyń barlyǵyna qulaq mańy shaınaý aımaǵyndaǵy isik, ıaǵnı tamyrlyq túzilis sebep boldy. 6 jasynda balaǵa isikti alyp tastaý úshin ota jasalǵan, alaıda ýaqyt óte kele ol qaıta paıda bolǵan. Sońǵy eki jyl boıy qaıtalanǵan isik sklerozdaýshy terapııa ádisimen emdeldi. Bul – problemaly tamyrdy nemese qýys bólikti arnaıy preparat engizý arqyly joıý tásili. Preparat baqylalý túrde tamyr qabyrǵalaryn qalpyna keltirip, tamyrdyń jabylýyn qamtamasyz etýi tıis.
Bıyl qyrkúıek aıynda ata-anasy ulyn Almatydaǵy Balalarǵa shuǵyl medıtsınalyq kómek kórsetý ortalyǵynyń jaq-bet hırýrginen keńes alýǵa alyp kelgen. Tájirıbeli dárigerler – Serik Baltashuly Nurmaǵanov pen Aıda Ernstqyzy Ýrazaeva samaı-tómengi jaq býynyn endoprotezdeý otasyn jasaýdy uıǵardy.
«Naýqasta týǵannan beri tamyrlyq patologııa – qulaq mańy shaınaý aımaǵynyń gemangıomasy bolǵan, ol kezeń-kezeńimen sklerozdaýshy terapııa arqyly em qabyldady. Gemangıoma (jańa nomenklatýra boıynsha – malformatsııa) sátti emdeldi. Alaıda onyń saldary retinde tómengi jaq súıeginiń sol jaq bóligi durys damymaǵan – býyn basy, tarmaǵy, buryshy men súıek denesiniń bir bóligi gıpoplazııaǵa ushyrap, jartylaı atrofııa baıqaldy. Bul aýzyn tolyq ashýǵa shekteý qoıyp, bet qańqasynyń deformatsııasyna ákeldi. Biz barlyq zertteýlerdi, kompıýterlik modeldeýdi júrgizdik jáne osy derekterdiń negizinde arnaıy tapsyryspen tómengi jaqtyń sol jaq býyn, tarmaq, burysh jáne súıek denesi aımaǵyna jeke protez daıyndaldy. «Tómengi jaq súıegin rezektsııalaý jáne bir mezette samaı-tómengi jaq býynyn, tarmaǵyn, buryshyn, denesin endoprotezdeý» otasy jasaldy. Ózgeriske ushyraǵan tinder men deformatsııalanǵan býyn alynyp tastaldy, býyn oıyǵy múldem bolmaǵan. Osy jeke endoprotezdiń kómegimen biz tómengi jaqty tolyq qalpyna keltirdik. Shaınaý, sóıleý, aýyz ashý fýnktsııalary tolyq ornyna keldi. Eń bastysy – bet pishini ózgerip, sımmetrııaǵa qol jetkizildi. Endi ol óz qurdastarymen erkin aralasa alady, ári qaraı deformatsııa qaýpi joq, óıtkeni bet qańqasy qalyptasyp úlgerdi»,
– dedi Almaty qalasyndaǵy Balalarǵa shuǵyl medıtsınalyq kómek kórsetý ortalyǵynyń jaq-bet hırýrgi, medıtsına ǵylymdarynyń doktory Serik Nurmaǵanov.
Bul – Almatydaǵy Balalarǵa shuǵyl medıtsınalyq kómek kórsetý ortalyǵy bazasynda jasalǵan samaı-tómengi jaq býynyn endoprotezdeý boıynsha ekinshi ota.
Atalǵan ortalyq jaq-bet aımaǵynda túrli patologııasy bar balalar men jasóspirimderdi qabyldaýǵa daıyn. Hırýrgtar súıek jáne jumsaq tinderdegi aqaýlardy jeke daıyndalǵan protezder arqyly qalpyna keltirýge qabiletti.