Almatyda dárigerler kózine tas kirgen naýqastyń kórý qabiletin saqtap qaldy
ALMATY. KAZINFORM — Almatyda Ortalyq qalalyq klınıkalyq aýrýhananyń (OQKA) oftalmologteri naýqastyń kózinen tas synyǵyn alyp shyqty.
Qoǵamdyq densaýlyq saqtaý basqarmasynyń málimetinshe, jas jigit balǵamen tas shaǵyp jatqan sátte kózine joǵary jyldamdyqpen synyq kirip ketken jáne kózdegi birneshe qabyqshany tesip ótken.
Ol aýrýhanaǵa jetkizilgen soń, jaraqaty óte aýyr ekeni anyqtalǵan: qasań qabyq, kóz burshaǵy, nurly qabyq jáne kózdiń tereń qurylymdary zaqymdaldy.
— Tas synyǵy kózdiń ishine tereń enip ketken. Biz kúrdeli ota jasadyq. Qabyqshany tigip, jaraqattan paıda bolǵan kataraktany alyp tastadyq, kóz burshaǵyn bekitip, nurly qabyqqa plastıka jáne vıtrektomııa jasadyq. Ota barysynda synyqty taýyp, alyp shyqtyq, sodan keıin kózdiń qurylymyn saqtaý úshin sılıkon maıyn engizdik, — dedi oftalmologııa bólimshesiniń meńgerýshisi Gúlzat Ábdiraıymova.
Mamandar taspen jáne basqa da qatty materıaldarmen jumys isteý kezinde aýyr jaraqat alý qaýpi bar ekenin eske saldy. Sondaı-aq mundaı jumystardy oryndaý kezinde qorǵanysh kózildirigin kııý mindetti ekenin atap ótti.
Eske salaıyq, Túrkistanda eki batareıka jutyp qoıǵan toǵyz aılyq sábıge ota jasaldy.
