Almatyda dárigerler denesiniń 90%-y kúıip qalǵan azamatty ajaldan arashalap qaldy
ASTANA. KAZINFORM — Almatynyń № 4 qalalyq klınıkalyq aýrýhanasynyń dárigerleri gaz ballonynyń jarylýy saldarynan aýyr kúıik alǵan 26 jastaǵy er adamnyń ómirin saqtap qaldy. Bir aıǵa sozylǵan emnen keıin er adam úıine shyǵaryldy.
Er adamnyń óz úıiniń aýlasyndaǵy sharýashylyq qorasynda turǵan gaz ballony jarylyp ketken. Zardap shekken adam jalynnan aýyr kúıik alyp, № 4 qalalyq klınıkalyq aýrýhanasynyń qabyldaý bólimine jetkizildi.
Densaýlyq saqtaý mınıstrliginiń málimetinshe, dárigerler patsıentten barojaraqatty, dene betiniń 89%-yn qamtyǵan termııalyq kúıikti, onyń ishinde 15%-ynyń tereń kúıik ekenin, sondaı-aq sol qolynyń jumsaq tinderi aýqymdy zaqymdanǵan aýyr jaraqatyn anyqtady. Aýrýhanaǵa túsken alǵashqy mınýttardan bastap oǵan qarqyndy shokqa qarsy em júrgizildi.
Patsıent aýrýhanaǵa jatqyzylǵan kúni-aq zaqymdanǵan qolyna shuǵyl qalpyna keltirý operatsııasy jasaldy. Keıingi aptalarda em kúıik bólimshesinde jalǵasty. Patsıent birneshe kezeńnen turatyn hırýrgııalyq em qabyldady, onyń ishinde terini transplantattaý (aýtodermoplastıka) men zaqymdanǵan aıaq-qolǵa rekonstrýktıvtik operatsııalar jasaldy. Osy ýaqyt boıy dárigerler ómirlik mańyzdy aǵzalardyń qyzmetin, aspaptyq jáne zerthanalyq kórsetkishterdi kún saıyn baqylap, naýqastyń jaǵdaıyna sáıkes emdeý taktıkasyn túzetip otyrdy.
— Patsıent bizge óte aýyr jaǵdaıda tústi. Tórt táýlik boıy reanımatsııada boldy. Jaǵdaıy turaqtanǵannan keıin kúıik bólimshesine aýystyryldy. Mundaı aýqymdy kúıikter dárigerler úshin árdaıym eń kúrdeli synaqtardyń biri. Klınıkanyń mýltıdıstsıplınarlyq komandasynyń úılesimdi jumysynyń arqasynda biz patsıenttiń ómirin saqtap qala aldyq, — dedi № 4 qalalyq klınıkalyq aýrýhanasynyń kúıik bólimshesiniń meńgerýshisi Eldos Álmenov.
Patsıenttiń ózi Aleksandr Artýkov emdeý barysynda kórsetilgen kómek pen qoldaý úshin dárigerler men medıtsına qyzmetkerlerine alǵysyn bildirdi.
— Kúıik jáne reanımatsııa bólimshesiniń medıtsına qyzmetkerleriniń, kardıologtardyń, terapevterdiń, travmatologtardyń arqasynda em óte jaqsy ótti. Barlyq emshara joǵary kásibı deńgeıde ári barynsha aýyrtpalyqsyz uıymdastyryldy. Maǵan tek fızıkalyq emes, moraldyq qoldaý da kórsetildi, óıtkeni mundaı jaraqattardy eńserý óte qıyn. Sanıtarlardan bastap meıirgerlerge, dárigerler men anestezıologtarǵa deıingi barlyq medıtsına qyzmetkerlerine shyn júrekten alǵysymdy bildiremin. № 4 qalalyq klınıkalyq aýrýhanasynyń ujymyna kásibı biliktiligi úshin erekshe rızamyn, — dedi patsıent.
Aýrýhanaǵa jatqyzylǵannan keıin bir aı ótken soń er adam statsıonardan shyǵaryldy. Emdeý barysynda ol qaıtadan ózdiginen júrip-turyp, ózin-ózi kúte alatyn jaǵdaıǵa jetti. Alda ony uzaq ońaltý kezeńi kútip tur.
Eske salaıyq, buǵan deıin Aqtóbede gaz quıý beketindegi órtten aman qalǵan er adamǵa kúrdeli ota jasalatynyn jazǵanbyz.
