Almatyda dárigerler besinshi qabattan qulaǵan 4 jasar balany aman alyp qaldy
ALMATY. KAZINFORM — Almaty qalalyq Balalarǵa shuǵyl medıtsınalyq kómek kórsetý ortalyǵynyń dárigerleri turǵyn úıdiń besinshi qabatynan qulap, aýyr jaraqat alǵan tórt jastaǵy balaǵa kúrdeli neırohırýrgııalyq ota jasap, aman alyp qaldy.
Qoǵamdyq densaýlyq saqtaý basqarmasynyń málimetinshe, bala aýrýhananyń qabyldaý bólimine aýyr jaǵdaıda jetkizilgen. Tekserý barysynda dárigerler kóptegen jaraqattardy, sonyń ishinde julynǵa qysym túsirgen birinshi bel omyrtqasynyń synýyn anyqtaǵan.
Balanyń jaǵdaıyn eskergen mamandar emdeýdi eki kezeńmen júrgizý týraly sheshim qabyldady. Aldymen neırohırýrgter omyrtqa ózegindegi qysymdy azaıtý otasyn jasap, keıin bel omyrtqasyn arnaıy bekitý júıesi arqyly turaqtandyrdy.
Der kezinde kórsetilgen medıtsınalyq kómektiń arqasynda dárigerler balanyń qozǵalý jáne seziný qabiletin saqtap qaldy.
— Biz balanyń qozǵalysyn qalpyna keltirdik. Ońaltý kýrsynan keıin ol ózdiginen júre alady, — dedi Kúrdeli otany neırohırýrgııa bóliminiń meńgerýshisi Aıdyn Núsipqojaev.
Qazirgi ýaqytta kishkentaı naýqastyń jaǵdaıy edáýir jaqsarǵan. Statsıonarlyq em aıaqtalǵannan keıin ol úıine shyǵarylyp, ambýlatorııalyq baqylaý men ońaltý emin jalǵastyrady.
Eske salaıyq, buǵan deıin Astanada jyl basynan beri 7 bala terezeden qulap, mert bolǵanyn habarlaǵan edik.
