Almatyda dárigerler 8 saýsaqpen týǵan balaǵa biregeı operatsııa jasady
ALMATY. KAZINFORM — Almatydaǵy № 2 qalalyq balalar klınıkalyq aýrýhanasynda aıaq-qoldyń týabitti jáne júre paıda bolǵan kemistikteriniń zardabyn tartyp kele jatqan balalarǵa rekonstrýktıvtik otalar jasaldy.
— RF-nyń Sankt-Peterbýrg qalasynan shaqyrylǵan hırýrg Sergeı Golıannyń jetekshiligimen ótken sheberlik saǵaty barysynda 8 qazaqstandyq balaǵa kúrdeli ota jasaldy. Reseıdiń ataqty plastıkalyq hırýrgi taǵy 20 kishkentaı patsıentke konsýltatsııa berip, otandyq áriptesterimizge mıkrohırýrgııa salasyndaǵy ozyq ádistemeler jóninde lektsııa oqydy. Bul sharanyń Qazaqstandaǵy balalar mıkrohırýrgııasyn damytýǵa qosar úlesi zor, — deıdi № 2 QBKA dırektory Marat Rabandııarov.
Aýrýhananyń baspasóz qyzmetinen málim etkendeı, patsıentterdiń eń kishisi 1 jasta. Bala 8 saýsaqpen týǵan. Polıfalangııa dep atalatyn kemistik saldarynan ósip kele jatqan balanyń qolyndaǵy artyq saýsaqtar oıynshyqtardy ustap, alaqanyn ashyp-jumýǵa kedergi keltirgen.
— Biz úshin bul keremet jańalyq boldy. Osyndaı otany Almatyda, tegin jasatamyz degen oı úsh uıyqtasaq túsimizge kirmegen edi, — deıdi anasy.
Aıta keteıik, kúrdeli operatsııalardyń bári MÁMS qarajaty esebinen jasaldy.
Osyǵan deıin Aqtaýda sheteldik dárigerler 3 balaǵa kúrdeli ota jasaǵan bolatyn.