Almatyda dárigerler 8-qabattan qulaǵan jasóspirimdi aman alyp qaldy

Almaty qoǵamdyq densaýlyq saqtaý basqarmasynyń málimetinshe, jasóspirim shamamen 24 metr bıikten asfaltqa qulaǵan. Ony aýrýhanaǵa jedel járdem brıgadasy jetkizgen jáne aýrýhanada balanyń jaǵdaıy asa aýyr dep baǵalanǵan.

Dárigerler balada birneshe músheniń qatar zaqymdanǵanyn, bas súıek pen mıdyń jabyq jaraqatyn, mıdyń soǵylýyn, qol-aıaq súıekteriniń kóptegen jerden synǵanyn, keýde jáne qursaqqýysy aǵzalarynyń zaqymdanǵanyn anyqtaǵan. Naýqas shuǵyl túrde anestezıologııa, reanımatsııa jáne qarqyndy terapııa bólimine jatqyzylǵan.

— Bala aýrýhanaǵa túsken kezde onyń jaǵdaıy asa aýyr boldy. Dereý shokqa qarsy sharalar qabyldanyp, qan aınalymyn turaqtandyrýǵa jáne aǵzanyń ómirlik mańyzdy qyzmetterin saqtaýǵa baǵyttalǵan qarqyndy em bastaldy. Alǵashqy eki táýlikte reanımatologtardyń basty mindeti naýqastyń jaǵdaıyn turaqtandyrý boldy. Jaǵdaıy birshama túzelgennen keıin bala qajetti hırýrgııalyq kómek kórsetý úshin operatsııalyq bólmege jetkizildi. Otadan keıin eleýli asqyný bolǵan joq. Keıin jaǵdaıy jaqsarýyna baılanysty naýqas beıindi bólimshege aýystyryldy, — dedi № 1 qalalyq balalar klınıkalyq aýrýhanasy reanımatsııa bóliminiń meńgerýshisi Medetáli Maqulbekov.

Jasópirimge travmatologtar men reanımatologtardan quralǵan medıtsınalyq top barlyǵy tórt ota jasady.

— Bolǵan jaǵdaıdyń qanshalyqty aýyr ekenin sózben jetkizý qıyn. Segizinshi qabattan qulaý — asa aýyr jaraqat. Mundaı jaǵdaıda balanyń aman qalýynyń ózi úlken ǵajaıyp deýge bolady. Bizdiń komanda qajetti medıtsınalyq kómekti dereý kórsetýge kiristi. Alǵan jaraqattarynyń sıpatymen aýyrlyǵyn eskere otyryp, tórt ota jasaý týraly sheshim qabyldandy. Barlyq ota sátti ótti. Alda balany ári qaraı emdeý, qalpyna keltirý jáne ońaltý kezeńderi kútip tur, — dedi № 1 qalalyq balalar klınıkalyq aýrýhanasy dırektordyń orynbasary Qurmetbek Toqtar.

Eske salaıyq, buǵan deıin Almatyda 8 jastaǵy balanyń mıyna kúrdeli ota jasaldy.