Almatyda dárigerler 5 keliden asatyn jatyr mıomasyn sátti alyp tastady
ALMATY. KAZINFORM — Almatynyń № 2 qalalyq perınataldyq ortalyǵyna júktiliktiń 35-aptasynda qaǵanaq sýy merziminen buryn ketken 40 jastaǵy júkti áıel shuǵyl túrde jetkizildi. Tekserý barysynda dárigerler uryqtyń ómirine qaýip tóndiretin qan aınalymynyń buzylýyn anyqtady. Osyǵan baılanysty shuǵyl kesar tiligin jasaý týraly sheshim qabyldandy.
Densaýlyq saqtaý mınıstrliginiń málimetinshe, ota kezinde mamandar kólemi 20×25 santımetr bolatyn alyp mıomany anyqtady. Jaǵdaı aıqyn jabysqaq úderispen kúrdelene túsken: ishek jatyrǵa tyǵyz jabysyp qalǵan.
Klınıkalyq jaǵdaıdyń kúrdeliligin eskere otyryp, № 2 qalalyq perınataldyq ortalyqtyń dırektory Svetlana Raqymova shuǵyl operatsııany jedel uıymdastyryp, hırýrgııalyq aralasýǵa Almaty onkologııalyq ortalyǵynyń onkogınekology Raıhan Bolatbekovany tartty.
— Dárigerlerdiń birlesken kúsh-jigeriniń arqasynda sábıdi aman-esen dúnıege ákelip qana qoımaı, naýqastyń jatyry men reprodýktıvtik fýnktsııasyn saqtaı otyryp, salmaǵy 5,1 keli bolatyn alyp isikti de alyp tastaýǵa múmkindik týdy. Bul áıelge bolashaqta qaıtadan ana atanýǵa múmkindik beredi, — delingen habarlamada.
Salmaǵy 2,2 keli bolatyn shala týǵan ul bala dúnıege keldi. Týǵannan keıin sábı jańa týǵan nárestelerdiń reanımatsııa bólimshesi mamandarynyń baqylaýynda boldy. Ýaqtyly kórsetilgen medıtsınalyq kómektiń arqasynda onyń jaǵdaıy turaqtandy.
Qazirgi kezde ana men sábıdiń jaǵdaıy jaqsy, olar úıine shyǵaryldy.
Eske salaıyq, buǵan deıin Almaty oblysynda 10 jyl boıy isiktiń zardabyn tartyp kelgen áıelge ota jasalǵanyn habarlaǵan edik.
