Almatyda «Damubala» baǵdarlamasyna sapaly qyzmet kórsetýshiler ǵana qatysa alady
ALMATY. KAZINFORM – Almatyda «Damubala» baǵdarlamasyna qatysty júıeli tártip ornatylady. Onda tek sapaly qyzmet kórsetetin jetkizýshiler jumys isteı alady. Bul týraly qala ákimi Erbolat Dosaev Medeý aýdanynyń turǵyndarymen kezdesý barysynda málim etti. Shahar basshysy Almaty - «Damubala» baǵdarlamasyna jetkilikti kólemde aqsha bólgen jalǵyz óńir ekenin atap ótti.
«Kóp óńir baǵdarlamany qysqartty. Bizde qalaǵa 16,5 mlrd teńge bólindi. Ákimdik baǵdarlamany únemi qoldap otyrady jáne ony jaqsarta túsemiz», - dedi ákim.
Sondaı-aq, ákim Artsport platformasynan Damubala platformasyna kóshý kezinde eski vaýcherler qalǵanyn, olar osy jyldyń sońyna deıin jaramdy ekenin aıtty.
«Jańa jylda – júıeli tártip pen adal qyzmet kórsetetin kásipkerlerden turatyn jańa vaýcherler bolady. Baǵdarlamany qýana qoldaımyn jáne qajet bolsa baǵdarlamany keńeıtý úshin qosymsha qarjy kózderin tabamyn. Biz ótken jyldyń ekinshi jartysynan jáne osy jyldan bastap sapaly qyzmet kórsetýshilerdi tabýǵa tyrysamyz», - dedi ákim.
Sondaı-aq, qala basshysy qarjy basqarmasy men Medeý aýdanynyń ákimdigine kásipkerlerge, «Damubala » baǵdarlamasy boıynsha qyzmet kórsetýshilerge aqsha tóleýge qatysty máselelerdi sheshýdi tapsyrdy.
«Biz tamyz aıynyń sońyna deıin barlyq aktini salystyryp tekserip, tólem jasaımyz», - dedi aýdan ákimi Erkebulan Orazalın.
2023 jyldyń sáýir aıynda ortalyqsyzdandyrý aıasynda aýdan ákimdikterine «Damubala » baǵdarlamasy boıynsha memlekettik shyǵarmashylyq jáne sporttyq tapsyrysty iske asyrý tapsyrylǵan edi.
