Almatyda dámhanalarǵa mangal men tandyr paıdalanýǵa shekteý qoıyldy
ALMATY. KAZINFORM — Almatynyń Túrksib aýdanynda «Almaty — taza aýa» ekologııalyq aktsııasy aıasynda dámhana, káýaphana, dúken jáne basqa da kommertsııalyq nysandardyń ıelerine túsindirý jumystary júrgizildi. Kásipkerlerge otyn, mangal paıdalaný jáne aýany tazartý júıelerine qoıylatyn talaptar eskertildi.
Almatynyń Ekologııa jáne qorshaǵan orta basqarmasynyń málimetinshe, mamandar birneshe qoǵamdyq tamaqtaný ornyna barǵan. Nysan ıelerine kómir men otynnyń ornyna gaz nemese elektr jabdyqtaryn paıdalanýǵa kóshý qajet ekeni aıtyldy.
Qatty otyn jaǵý kezinde aýaǵa tútin, kúıe jáne zııandy zattar taraıdy. Bul jaqyn mańdaǵy turǵyn úılerde turatyn adamdardyń densaýlyǵyna keri áser etýi múmkin.
— Sanıtarııalyq qaǵıdalarǵa sáıkes, turǵyn úılerde jáne basqa da ǵımarattarda ornalasqan qoǵamdyq tamaqtaný oryndarynda qatty otynmen jumys isteıtin mangaldar men tandyrlardy paıdalanýǵa tyıym salynady. Taǵam daıyndaý úshin gaz jáne elektr jabdyqtary, sondaı-aq tútin men ıisti súzgiden ótkizetin jeldetý júıeleri qoldanylýy tıis, — delingen habarlamada.
Qosymsha shekteýler Almaty máslıhatynyń 2025 jyly 30 jeltoqsanda bekitken Atmosferalyq aýany qorǵaý qaǵıdalarynda da kózdelgen. Qujatqa sáıkes, gazdandyrylǵan aýmaqtardaǵy shyǵaryndylary tómen aımaqtarda (LEZ) óndiristik maqsatta qatty jáne suıyq otyn paıdalanýǵa tyıym salynady. Bul talaptar 2027 jyly qańtardan bastap kúshine enedi. Al LEZ aýmaǵynda tıisti shekteýler Almaty qalasy ákimdiginiń qaýlysy bekitilip, aımaqtyń turaqty shekaralary belgilengennen keıin qoldanysqa engiziledi.
Kásipkerlerge jyl sońyna deıin tabıǵı gazǵa kóship, ekologııalyq talaptardy saqtaý usynyldy.
Sonymen qatar dámhanalardyń birine Almaty qalasyn kóriktendirý qaǵıdalaryn buzǵany úshin Ákimshilik quqyq buzýshylyq týraly kodeksiniń 505-baby boıynsha ákimshilik hattama toltyryldy. Aıyppul kólemi 20 AEK ne 86 500 teńge boldy.
2026 jyly 10 qarashadaǵy jaǵdaı boıynsha qalada kóriktendirý qaǵıdalaryn buzǵany úshin jalpy 1 mıllıon 211 myń teńge bolatyn 11 ákimshilik hattama toltyryldy. Olardyń qatarynda qoǵamdyq tamaqtaný oryndarymen birge basqa da saladaǵy uıymdar bar.
Eske salaıyq, aýlada kólik jýý, qoqys órteý, mangal jaǵýǵa bolmaıtyny aıtyldy.
