Almatyda BUU standartyndaǵy shtab ofıtserleri kýrsy aıaqtaldy
ASTANA. KAZINFORM — Almatydaǵy Qazaqstan Respýblıkasy Qorǵanys mınıstrliginiń Bitimgerlik operatsııalar ortalyǵy bazasynda BUU standarttaryna sáıkes uıymdastyrylǵan eki aptalyq sertıfıkattalǵan «BUU shtab ofıtserleri» kýrsy aıaqtaldy. Bul týraly Qorǵanys mınıstriligi málimdedi.
Oqytýǵa Qarýly kúshter, Ulttyq ulan, Tótenshe jaǵdaılar mınıstrligi áskerı qyzmetshileri, Pákistan men Qytaıdan kelgen tyńdaýshylar, sondaı-aq Qazaqstan menedjment, ekonomıka jáne boljaý ınstıtýtynyń ókilderi qatysty. Sabaqqa Frantsııa men Serbııadan kelgen nusqaýshylar da tartyldy.
Tyńdaýshylar BUU bitimgerlik operatsııalarynyń júıesin, qaǵıdattaryn, sondaı-aq olardy josparlaý men iske asyrý tetikterin jan-jaqty meńgerdi. Oqý baǵdarlamasy teorııa men praktıkany ushtastyrý negizinde quryldy.
— Áskerı qyzmetshiler shtab ofıtserleriniń jumys algorıtmderin ıgerip, naqty jedel jaǵdaılarǵa negizdelgen oqý-jattyǵýlarǵa qatysty. Kýrs barysynda halyqaralyq gýmanıtarlyq quqyq, BUU normatıvtik-quqyqtyq bazasy jáne mıssııalardy logıstıkalyq qamtamasyz etý máseleleri keńinen qarastyryldy, — delingen habarlamada.
Bitimgerlik operatsııalar ortalyǵy bastyǵynyń orynbasary podpolkovnık Rústem Súleımenov atap ótkendeı, bitimgerlerdi daıarlaý halyqaralyq qaýipsizdikti qamtamasyz etý men beıbitshilikti saqtaý baǵytyndaǵy memlekettik saıasattyń basym baǵyttarynyń biri.
Tyńdaýshylardyń kópultty ortada jumys isteý qabiletin arttyrý jáne mıssııalarǵa qatysýshylardyń halyqaralyq úılesimdiligin qamtamasyz etý maqsatynda oqý aǵylshyn tilinde júrgizildi.
Bul kýrs Qazaqstannyń bitimgerlik áleýetin damytýǵa jáne onyń halyqaralyq qaýipsizdik júıesindegi senimdi seriktes retindegi ustanymyn nyǵaıtady.
Eske sala keteıik, buǵan deıin qazaqstandyq bitimgerler Golan jotalarynda 90-nan astam turǵynǵa medıtsınalyq kómek kórsetkenin jazǵan edik.
