Almatyda BUU Damý baǵdarlamasynyń sýbóńirlik keńsesi ashylýy múmkin
ASTANA. KAZINFORM — Qazaqstan Premer-mınıstri Oljas Bektenov Astana halyqaralyq forýmyna qatysý úshin kelgen BUU Bas hatshysynyń orynbasary, BUU Damý baǵdarlamasy Ákimshisiniń orynbasary Haolıan Shýmen kezdesti, dep habarlaıdy Úkimettiń baspasóz qyzmeti.
Onda Ortalyq Azııa aımaǵyndaǵy ekologııa jáne klımattyń ózgerýine tózimdilikti arttyrý salasyndaǵy yntymaqtastyq jáne birlesken jobalardy júzege asyrý máseleleri talqylandy.
Premer-mınıstr BUU-nyń Ornyqty damý maqsattaryna qol jetkizý Qazaqstannyń basty basymdylyqtarynyń biri ekenin atap ótti. ODM-ny iske asyrý jónindegi mindetter birqatar strategııalyq qujattarǵa kiriktirilgen. Jalpy, BUU-men áriptestik ornatqan jyldar ishinde elimizde túrli salada 200 joba júzege asyrylǵan. Sonyń ishinde qazir Qazaqstanda 35 joba boıynsha jumys júrgizilýde, olar — densaýlyq saqtaý salasyn tsıfrlyq transformatsııalaýdyń keshendi tásilderi; áleýmettik qorǵaý baǵdarlamalarynyń tıimdiligi men qoljetimdiligin arttyrý; energııa tıimdiligi salasyna ınvestorlardy tartý úshin jaǵdaı jasaý; aýyl sharýashylyǵy óndirisiniń turaqty júıesin ilgeriletý; adam quqyqtaryn qorǵaýdyń ulttyq tetikteriniń tıimdiligin kúsheıtý jáne taǵy da basqalar.
Kezdesýde Almatyda BUU DB-nyń sýbóńirlik keńsesin ashý perspektıvalaryna nazar aýdaryldy. Ol Ortalyq Azııanyń syrtqy syn-qaterlerge tózimdiligin nyǵaıtý salasyndaǵy birlesken kúsh-jigerdi úılestirý baǵytynda jumys isteıtin bolady. Ortalyq Azııa aımaǵy jahandyq saýda men energetıkada negizgi oıynshylardyń birine aınalyp keledi. Áıtse de, zor áleýeti bola tura, munda klımattyń ózgerýiniń saldary, sý tapshylyǵy, syrtqy ekonomıkalyq silkinister syndy taǵy da basqa syn-qaterler týyndap otyr.
— Prezıdent Qasym-Jomart Toqaev Birikken Ulttar Uıymymen áriptestikti nyǵaıtýǵa úlken mán beredi. Memleket basshysy men BUU Bas hatshysy Antonıý Gýterrısh arasyndaǵy ózara konstrýktıvti qatynas birlesken bastamalardy ilgeriletýge qosymsha serpin berip otyr. Qazaqstan klımattyń ózgerýi problemalaryn sheshýdi tolyqtaı qoldaıdy. Biz klımatqa qatysty máselelerdi damý josparlarymyzǵa keńinen engizip, halyqaralyq seriktestermen tyǵyz jumys isteýdemiz. Bizdiń kómirtegi beıtaraptyǵy týraly strategııamyz tómen kómirtekti ekonomıkaǵa kóshý jónindegi naqty da uzaq merzimdi perspektıvalardy qamtıdy, ári barlyq sektorlar boıynsha qajetti negizgi ózgeristerdi aıqyndaıdy, — dep atap ótti Oljas Bektenov.
Óz kezeginde Haolıan Shý BUU DB-nyń aımaqtaǵy áleýmettik jáne ekologııalyq bastamalaryn júzege asyrý jolyndaǵy Qazaqstanmen jan-jaqty yntymaqtastyqtyń mańyzdylyǵyn atap ótti.
Kezdesý qorytyndysynda taraptar barlyq perspektıvalyq baǵyttar boıynsha seriktestikti damytýǵa yqpal etý nıetterin rastady.
Buǵan deıin habarlanǵandaı, Bektenov pen Dúnıejúzilik banktiń vıtse-prezıdenti Antonella Bassanı yntymaqtastyqty tereńdetý perspektıvalary men birlesken jobalardy talqylady.