Almatyda burynǵy vıtse-mınıstrler men Birinshi kredıttik bıýronyń eks-basshysyna sot úkimi shyqty
ALMATY.KAZINFORM - Almatyda Eńbek resýrstaryn damytý ortalyǵy men Birinshi kredıttik bıýro isi boıynsha bes adam sottaldy.
11 qarashada Almaty qalasynyń Almaly aýdandyq sotynda Eńbek resýrstaryn damytý ortalyǵy men Birinshi kredıttik bıýro arasyndaǵy yntymaqtastyqqa baılanysty qoǵamda rezonans týdyrǵan sot protsesi aıaqtaldy.
Іs boıynsha burynǵy vıtse-mınıstrler men top-menedjerlerdi qosa alǵanda, bes adam aıyptaldy. Sot olardyń barlyǵyn birneshe bap boıynsha kináli dep tanydy. Alaıda keıbir aıyptar boıynsha aqtaý úkimin shyǵaryp, qylmystyq is aıasynda mıllıardtaǵan teńge kólemindegi zalaldy óndirip alýdan bas tartty.
Para jáne sybaılastyq boıynsha 7 jyl 6 aıǵa sottaldy
Sonyń ishinde eń qatań jaza 7 jyl 6 aı bas bostandyǵynan aıyrý boldy. Bul jaza Eńbek resýrstaryn damytý ortalyǵynyń burynǵy basshysy, Densaýlyq saqtaý jáne áleýmettik damý vıtse-mınıstri bolǵan Dáýlet Arǵandyqov pen Birinshi kredıttik bıýronyń burynǵy bas dırektory Rýslan Omarovqa taǵaıyndaldy.
Dáýlet Arǵandyqov Qylmystyq kodekstiń úsh baby boıynsha kináli dep tanyldy. Atap aıtqanda, aýyr zardaptarǵa ákep soqqan laýazymdyq ókilettikterdi teris paıdalanǵany úshin (361-baptyń 4-bóligi 3-tarmaǵy) 4 jylǵa, aýyrlatatyn mán-jaılar kezinde zııandy kompıýterlik baǵdarlamalardy jasaǵany nemese paıdalanǵany úshin (210-baptyń 2-bóligi 1, 2, 3-tarmaqtary) 4 jylǵa jáne aýyrlatatyn mán-jaılar kezinde para bergeni úshin (367-baptyń 3-bóligi 1, 2-tarmaqtary) 7 jylǵa sottaldy.
Al Rýslan Omarov para bergeni úshin (QK 367-babynyń 3-bóligi 1, 2-tarmaqtary) 7 jylǵa, laýazymdyq ókilettikterdi teris paıdalanýǵa kómekteskeni úshin (QK 361-babynyń 4-bóligi 3-tarmaǵy jáne 28-baptyń 5-bóligi) 3 jyl 6 aıǵa, sondaı-aq zııandy kompıýterlik baǵdarlamalardy paıdalanýǵa kómekteskeni úshin (QK 210-babynyń 2-bóligi 1, 2, 3-tarmaqtary jáne 28-baptyń 5-bóligi) 4 jylǵa bas bostandyǵynan aıyryldy.
Sot ekeýine de memlekettik qyzmette jáne birqatar uıymdarda, sonyń ishinde kvazımemlekettik sektorda qyzmet atqarýǵa ómir boıyna tyıym saldy.
Tórt jylǵa sottaldy, biraq bir aıyp boıynsha aqtaldy
Eńbek jáne halyqty áleýmettik qorǵaý mınıstriniń burynǵy orynbasary, Arǵandyqovtan keıin Eńbek resýrstaryn damytý ortalyǵyn basqarǵan Aqmádı Sarbasov 4 jylǵa sottaldy. Oǵan memlekettik qyzmette jumys isteýge ómir boıyna tyıym salyndy.
Sot ony para alǵany úshin (QK 366-babynyń 2-bóligi) kináli dep tanydy.
Alaıda laýazymdyq ókilettikterdi teris paıdalandy degen aıyp boıynsha (QK 361-babynyń 4-bóligi 3-tarmaǵy) aqtaý úkimin shyǵardy. Sýdıanyń túsindirýinshe, Sarbasov ortalyqty nebári eki jarym aı basqarǵan, daýly qosymsha kelisimge qol qoımaǵan jáne paıyzdyq araqatynasty teńestirý úshin ózi sharalar qabyldaǵan.
- Ol «Eńbek resýrstaryn damytý ortalyǵy» AQ prezıdenti qyzmetine taǵaıyndalǵannan keıin paıyzdyq araqatynasty teńestirý úshin sharalar qabyldaǵan. Qosymsha kelisimge ol qol qoıǵan joq. Ol bar bolǵany 2,5 aı jumys istedi. Sondyqtan sot onyń kinási dáleldenbedi dep esepteıdi, – dep túsindirdi sýdıa.
Sol úshin Dáýlet Arǵandyqov pen Rýslan Omarovqa da Sarbasovqa laýazymdyq ókilettikterin teris paıdalanýǵa kómektesti degen aıyp ta taǵylmaıtyn boldy.
Іs boıynsha taǵy eki fıgýrant – Eńbek resýrstaryn damytý ortalyǵy departamentiniń burynǵy dırektory Táýke Bolatbaev pen ortalyq qyzmetkeri Aqjol Doshımov zııandy kompıýterlik baǵdarlamalardy jasaǵany, paıdalanǵany nemese taratqany úshin (QK 210-babynyń 2-bóligi 1, 2, 3-tarmaqtary) kináli dep tanyldy.
Bastapqyda sot olardyń árqaısysyna 3 jyl bas bostandyǵynan aıyrý jazasyn taǵaıyndady. Alaıda Konstıtýtsııanyń 30 jyldyǵyna oraı jarııalanǵan raqymshylyq qoldanylyp, jaza úshten birge qysqartyldy. Nátıjesinde ekeýi de 2 jylǵa sottaldy.
Sonymen qatar olarǵa bir jyl boıy aqparattyq júıelerge, telekommýnıkatsııa jelilerine jáne baǵdarlamalyq ónimderge baılanysty qyzmetpen aınalysýǵa tyıym salyndy.
Úkim shyqqanǵa deıin Bolatbaev pen Doshımov eshqaıda ketpeý týraly qolhatpen júrgen. Úkim jarııalanǵannan keıin ekeýi de sot zalynda qamaýǵa alyndy.
Sottalǵan bes adam da jazasyn qylmystyq-atqarý júıesiniń ortasha qaýipsizdik mekemelerinde óteıdi. Úkim zańdy kúshine engenge deıin tergeý ızolıatorynda ótkizgen árbir kúni bas bostandyǵynan aıyrýdyń bir jarym kúni retinde esepteledi.
75 myń dollar tárkilenip, 2 mıllıard teńgeden astam zalal óndirilmeıtin boldy
Úkimde zattaı dáleldemeler men tergeý málimdegen zalaldyń taǵdyry da jeke qarastyryldy. Almaty qalasy boıynsha Ekonomıkalyq tergeý departamentiniń depozıttik shotynda saqtalǵan 75 myń dollar memleket kirisine tárkilenetin boldy.
Sýdıa is materıaldarynda kórsetilgen para somasyna qatysty da túsinikteme berdi.
- Arǵandyqov pen Omarov 75 myń dollar para bergeni úshin kináli dep tanyldy. Sondyqtan paranyń jalpy somasy 75 myń dollar bolyp esepteledi, al Sarbasov alǵan soma – 8 myń dollar, – dedi sýdıa.
Al tergeý nusqasy boıynsha Eńbek resýrstaryn damytý ortalyǵyna keltirilgen 2 mıllıard teńgeden astam zalaldy sot qylmystyq is aıasynda óndirip alýdan bas tartty.
- Eki mıllıard teńgeden astam soma – «Eńbek resýrstaryn damytý ortalyǵy» AQ-nyń alynbaı qalǵan paıdasy, ıaǵnı jiberip alǵan paıdasy. Al mundaı zalal qylmystyq sot isin júrgizý aıasynda qarastyrylmaıdy, – dep atap ótti sýdıa.
Jábirlenýshi taraptyń ókiline bul somany azamattyq sot isin júrgizý tártibimen óndirip alýǵa quqyǵy bar ekeni túsindirildi.
Úkim ázirge zańdy kúshine engen joq.
Eske salsaq, Almatyda basqarmalardyń eks-basshylaryna ekinshi ret sot úkimi shyqqan edi.
