Almatyda burynǵy tramvaı relsteri LRT jobasyna qaıta paıdalanylýy múmkin
ALMATY. KAZINFORM — Almatyda ótken aıda burynǵy travmaı relsterin alý jumystary bastaldy.
Tramvaı jumysy toqtaǵannan beri Tóle bı kóshesinde turǵan relster LRT qurylysyna daıyndyq aıasynda alyna bastady.
Almaty ákimdigi atalǵan jumys kezinde jınalǵan materıaldardyń barlyǵy «Almatyelektrkólik» JShS-yna ótkiziletinin málimdedi. Osyǵan oraı, Kazinform agenttigi bul kompanııaǵa habarlasyp, kósheden alynǵan relster aldaǵy ýaqytta qaıda qoldanylatynyn surady.
«Almatyelektrkólik» JShS jaýabyna sáıkes, Tóle bı kóshesinde tramvaı joldaryn demontajdaý jumystary áli de júrgizilip jatyr. Al Jetisý kóshesindegi bul jumys tolyǵymen aıaqtalǵan. Jalpy bólshektelip, alynatyn relsterdiń uzyndyǵy — 15 km.
— Jumys jeńil relsti kólik (LRT) jelisi jobasyn iske asyrýǵa daıyndyq aıasynda júrgizilip jatyr. Demontaj barysynda jaramdylyǵy saqtalǵan relsterdiń bir bóligi LRT qurylysy kezinde qaıta paıdalanylady. Al tozyǵy jetken konstrýktsııalar kádege jaratýǵa, ıaǵnı ýtılızatsııaǵa jiberiledi, — dep habarlady kompanııadan.
Eske salaıyq, Almatyda LRT jobasynyń tehnıkalyq-ekonomıkalyq negizdemesi ázirlendi. Ol boıynsha jyldam relsti kólik jelisi B.Momyshuly kóshesimen ońtústik baǵytta Tóle bı kóshesine deıin, sosyn Tóle bı kóshesimen shyǵys baǵytta Abylaı han dańǵylyna deıin júredi. Odan ári Abylaı han dańǵylymen Almaty-2 temirjol vokzalyna deıin jalǵasady. Sońǵy aıaldama «Raıymbek batyr» — kólik-aýysyp otyrý torabynyń aýmaǵynda qarastyrylǵan.
Sondaı-aq Almaty qalasy jol qozǵalysyn uıymdastyrý jáne jolaýshylar kóligi basqarmasynyń basshysy Erjan Dıhanbaev elordada iske qosylǵan LRT-dan almatylyq jobanyń basty aıyrmashylyǵyn atady.
