Almatyda burynǵy tramvaı deposynyń ornynda qurylys bastaldy: ne salynady
ALMATY. KAZINFORM – Almatyda burynǵy tramvaı deposynyń ornynda aýqymdy jobany iske asyrý bastaldy.
Qala ákimdiginiń málimetinshe, Gogol jáne Baıtursynov kósheleriniń qıylysynda ornalasqan aýmaqta jalpy aýdany shamamen 32 myń sharshy metr bolatyn kreatıvti klaster salý josparlanǵan. Joba kreatıvti ındýstrııalardy damytýǵa arnalǵan tolyqqandy ınfraqurylym qalyptastyrýǵa baǵyttalǵan.
Klaster quramynda kópfýnktsııaly kontsert zaly, qoǵamdyq holl men is-sharalarǵa arnalǵan keńistik, kreatıvti ındýstrııa ókilderine arnalǵan stýdııa men sheberhana, qazaqstandyq dızaınerlerdiń shoýrýmdary, zamanaýı óner galereıasy, qalalyq is-sharalar ótkizýge arnalǵan atrıým, sondaı-aq kreatıvti kásipkerlerge arnalǵan keńse keńistikteri qarastyrylǵan.
Budan bólek joba aıasynda amfıteatr, jazǵy sahna, saıabaq aımaǵy jáne balalar oıyn ınfraqurylymy bar kórkeıtilgen aýmaq salynyp, turǵyndar úshin ashyq ári qoljetimdi qoǵamdyq keńistik qalyptastyrylmaq.
- Atalǵan aýmaqtyń uzaq ýaqyt boıy paıdalanylmaýy osyndaı aýqymdy jobany ázirleý jáne kelisý jumystarynyń kúrdeliligimen baılanysty boldy. Óıtkeni joba qala qurylysy men saraptamanyń barlyq kezeńinen ótýdi talap etti. Búginde jobanyń tujyrymdamasy ǵana emes, jobalyq qujattamasy da tolyq bekitildi. Eski ǵımarattardy buzý jumystary aıaqtalyp, qurylystyń belsendi kezeńi bastaldy, – dep atap ótti ákimdikten.
Eske salaıyq, buǵan deıin Almatydaǵy burynǵy tramvaı deposynyń qazirgi jaı-kúıi qandaı ekenin jazǵanbyz.
