Almatyda burynǵy temirjol aýrýhanasyn qaıta jańartý jumystary taǵy da keıinge qaldy
ALMATY. KAZINFORM — Almatynyń ortalyǵyndaǵy burynǵy temirjol aýrýhanasynyń ǵımaratyn qaıta jańartý jumystary bastapqyda 2024 jyldyń kúzine josparlanǵanymen, 2026 jylǵa shegerildi.
Abaı men Masanshy kósheleriniń qıylysyndaǵy qańyrap bos turǵan bul ǵımarat kópshilikke temirjol aýrýhanasy retinde jaqsy tanys. Kóp jyldan beri bos turǵan nysan úısiz adamdardyń mekenine aınalǵan.
Synǵan terezeler, qıraǵan esikter, sýretke toly qabyrǵalar — úırenshikti kóriniske aınalǵan. Qazir ǵımarat arnaıy qorshaýmen jabylǵan.
Burynǵy aýrýhananyń ornynda qalalyq balalardy ońaltý ortalyǵyn ashý josparlanyp otyr.
Qalalyq qurylys basqarmasynyń Kazinform agenttiginiń resmı saýalyna bergen jaýabyna sáıkes, jobalyq-smetalyq qujattama 2025 jylǵy aqpanda memlekettik saraptamaǵa jiberilgen. Alaıda sáýirde «Memsaraptama» mamandary birqatar eskertý anyqtap, teris qorytyndy shyǵarǵan.
— Qazirgi ýaqytta jobalyq qujattamaǵa «Konstrýktıvtik sheshimder» bólimi boıynsha túzetýler engizildi, sondaı-aq «Memsaraptama» RMK eskertýlerine sáıkes tehnıkalyq tekserý qorytyndysy qaıta qaraldy. 2025 jylǵy qyrkúıektiń sońyna deıin jańartylǵan jumys jobasy qaıta saraptamaǵa joldanady, — dedi qurylys basqarmasy basshysynyń orynbasary Arafat Marat.
Qurylys-montaj jumystary 2026 jyldyń birinshi toqsanyna belgilenip otyr.
Burynǵy Túrksib aýrýhanasynyń ǵımaraty 1950 jyly sáýletshi Mıhaıl Kýdrıavtsevtiń jobasy boıynsha salynǵan. Bul nysan qaladaǵy «ulttyq stıldegi» sırek saqtalǵan ǵımarattardyń biri sanalady, onda klassıkalyq jáne óńirlik dástúrlerdiń sıntezi kórinis tapqan. 2021 jyly ǵımarat kommýnaldyq menshikke berilip, ony qaıta jańartý jospary jarııalanǵan edi.
Alǵashqyda qurylys jumystaryn 2022 jyldyń qarashasynda aıaqtaý josparlanǵan edi, biraq merzim birneshe ret — áýeli 2024 jyldyń qazan aıyna, keıin 2025 jyldyń mamyryna shegerildi.
Aıta keteıik, bul nysandy qaıta qurýǵa bıýdjetten 5,3 mlrd teńge bólinedi.
Almatyda biraz jyldar boıy qaraýsyz qalǵan ne jóndeý kórmegen ǵımarattar barshylyq.
Buǵan deıin Kazinform tilshisi jaýapty vedomstvolarǵa saýal joldap, qaladaǵy birneshe mańyzdy nysan boıynsha joba-jospardy anyqtaǵan edi.