Almatyda burynǵy temirjol aýrýhanasy men jer ýchaskeleri memleketke qaıtaryldy
ALMATY. KAZINFORM – Almaty prokýratýrasy qala ortalyǵynda ornalasqan temirjol aýrýhanasynyń ǵımaraty men jer ýchaskelerin memleket menshigine qaıtardy.
Prokýratýra málimetinshe, 2018 jyly birqatar mámile nátıjesinde buryn Temirjol apattar medıtsınasy gospıtaline tıesili bolǵan densaýlyq saqtaý nysany men jer ýchaskeleri jeke menshikke zańsyz ótip ketken.
- Saýyqtyrý maqsatyndaǵy jer ýchaskeleri jer jáne memlekettik múlik týraly zańnamanyń talaptaryn buza otyryp ótkizilgen. Sot talqylaýy barysynda mámilege qatysýshylardyń ózara affılırlengeni jáne memlekettik múliktiń básekelestik ortadan tys zańsyz shyǵarylǵany dáleldendi, - dep habarlady quqyq qorǵaý organy.
Nátıjesinde Almaly aýdany prokýratýrasynyń talap-aryzy boıynsha sot memlekettik múlikti ıelikten shyǵarý jónindegi mámilelerdi jaramsyz dep tanydy. Sot sheshimi zańdy kúshine endi, apellıatsııalyq shaǵym qanaǵattandyrýsyz qaldyryldy.
- Memleket menshigine jalpy aýmaǵy 0,3 ga bolatyn eki jer ýchaskesi jáne aýdany 1 628 m2 bolatyn ǵımarat qaıtaryldy. Qaıtarylǵan múliktiń jalpy quny 2 mlrd teńgeden asady, - delingen málimdemede.
Buǵan deıin qala prokýratýrasy atalǵan múlikti elektrondyq saýda-sattyq arqyly satýǵa jol bermedi.
Eske salaıyq, Almatynyń ortalyǵynda ornalasqan burynǵy temirjol aýrýhanasyn qaıta jańǵyrtý jospary alǵash ret 2021 jyly jarııalandy. Jobaǵa sáıkes, tarıhı ǵımarat balalarǵa arnalǵan zamanaýı ońaltý ortalyǵyna aınalýy tıis edi.
Bastapqy jospar boıynsha qurylys jumystary 2022 jyldyń qarashasynda aıaqtalýy kerek edi. Alaıda joba merzimi birneshe ret shegerildi: áýeli 2024 jyldyń qazanyna, keıin 2025 jyldyń mamyryna, aqyr sońynda 2026 jylǵa aýystyryldy.
Kópten kútken joba boıynsha naqty jumystar áli de bastalmady.
