Almatyda burynǵy sýdıa Svetlana Jolmanovaǵa qatysty sot úkimi shyqty

ALMATY. KAZINFORM — Medeý aýdandyq sotynyń burynǵy sýdıasy Svetlana Jolmanova 10 jylǵa bas bostandyǵynan aıyryldy. 

Úkimdi Medeý aýdandyq sotynyń sýdıasy Qanat Árinov shyǵardy.

Svetlana Jolmanova QR qylmystyq kodeksiniń 190-baby 4-bóliginiń 2-tarmaǵy (asa iri mólsherdegi alaıaqtyq) boıynsha kináli dep tanyldy. 

Sot ony 10 jylǵa bas bostandyǵynan aıyrdy.

S. Jolmanova 2021 jyldan bastap 2024 jylǵa deıin jyljymaıtyn múlik satyp alýǵa jáne tenderlik jobalarǵa qatysýǵa járdemdesý syltaýymen, aldaý jáne senimge qııanat jasaý arqyly azamattardyń mıllıondaǵan teńgesin qoldy qylǵan. Zardap shekkenderdiń arasynda onyń dostary, kórshileri, tanystary men áriptesteri bar.

— S. Jolmanova jazasyn qaýipsizdigi ortasha mekemede óteý týraly úkim shyǵarylsyn. Qamaý túrindegi bultartpaý sharasy ózgerissiz qaldyrylsyn, - dep sýdıa úkimdi jarııalady.

Atalǵan is boıynsha ekinshi aıyptalýshy Danııar Kúshalıev QR Qylmystyq kodeksiniń 190-babynyń 3-bóliginiń 1-tarmaǵymen kináli dep tanylyp, 3 jylǵa sottaldy.

Tergep-tekserý barysynda qylmystyq árekettiń 48 epızody anyqtalyp, olar bir iske biriktirildi. 

Buǵan deıin prokýror Raýshan Abdýlla aıyptaý aktisin oqyǵan bolatyn. 

Eske salaıyq, osyǵan deıin sottalýshy Svetlana Jolmanovaǵa qatysty sot otyrysy bes ret keıinge shegerilgen bolatyn. 

Buǵan deıin QR Bas prokýratýrasy Jolmanovanyń isi sotqa joldanǵany týraly habarlaǵan bolatyn.  

Eske salaıyq, byltyr eks-sýdıasy Svetlana Jolmanova ustalǵany týraly jazǵanbyz.  

Alǵash ret almatylyq sýdıa 2021 jyly alaıaqtyq jasady degen kúdikke ilingen.