Almatyda burynǵy sýdıa Svetlana Jolmanovaǵa qatysty sot otyrysy besinshi márte keıinge shegerildi

ALMATY. KAZINFORM — Almaty qalasy Medeý aýdandyq sotynyń burynǵy sýdıasy Svetlana Jolmanovaǵa qatysty sot otyrysy osymen besinshi ret shegerildi. 

Asa iri kólemde alaıaqtyq jasady dep aıyptalǵan burynǵy sýdıa Svetlana Jolmanova belgisiz sebeptermen sot otyrysyna kelmedi.

 

Almaty qalasynyń №2 Medeý aýdandyq sotynyń sýdıasy Qanat Árinov aıyptalýshy otyrǵan ýaqytsha ustaý ızolıatoryna saýalhat joldanatynyń aıtty.

— Svetlana Jolmanovanyń sot otyrysyna ne sebepti kelmegeni týraly mekemege saýalhat joldanatyn bolady. Osydan keıin sot boıynsha shara qoldaný týraly másele qaralady. Kelesi sot otyrysy 18 sáýir saǵat 10:00–de ótedi, — dedi ol.

Prokýror aıyptalýshynyń osymen sot otyrysyna besinshi márte kelmegenin málimdedi.

Buǵan deıin Bas prokýratýrasy Jolmanovanyń isi sotqa joldanǵany týraly habarlaǵan bolatyn.

Tergeýdiń málimetinshe, 2021 jyldan 2024 jylǵa deıingi kezeńde ol jyljymaıtyn múlik satyp alýǵa jáne tenderlik jobalarǵa qatysýǵa járdemdesý syltaýymen, aldaý jáne senimge qııanat jasaý arqyly azamattardyń 1 mıllıard teńgeden astam qarajatty qoldy qylǵan.

— Tergep-tekserý barysynda qylmystyq árekettiń 48 epızody anyqtalyp, olar bir iske biriktirildi. Tergep-tekserý aıaqtalǵannan keıin qylmystyq is Qazaqstan Respýblıkasy Qylmystyq kodeksiniń 190-baby 4-bóliginiń 2-tarmaǵy (asa iri mólsherdegi alaıaqtyq) boıynsha aıyptaý aktisimen máni boıynsha qaraý úshin sotqa joldandy, — dep habarlady Bas prokýratýrasynan.

Eske salaıyq, byltyr eks-sýdıasy Svetlana Jolmanova ustalǵany týraly jazǵanbyz. 

Alǵash ret almatylyq sýdıa 2021 jyly alaıaqtyq jasady degen kúdikke ilingen.