Almatyda burynǵy áıeline stalkıng jasaǵan er adam jazalandy

ALMATY. KAZINFORM – Almatyda azamattardy qasaqana qýdalaý men psıhologııalyq qysymnan qorǵaýǵa baǵyttalǵan Qylmystyq kodekstiń 115-1 baby boıynsha alǵashqy sot úkimderiniń biri shyqty.

Almaty polıtsııasynyń málimetinshe, er adam ózara qarym-qatynas úzilse de, burynǵy jubaıyn ańdýdy toqtatpaǵan. Ol jábirlenýshiniń júrip-turýyn baqylap, jeke ómirine zańsyz aralasqan, qorqytý úshin habarlamalar joldaǵan, sondaı-aq jumys ornynda jáne qoǵamdyq oryndarda janjal shyǵarǵan.

- Ol buryn polıtsııa nusqamasyn buzǵany úshin ákimshilik jaýapkershilikke tartylǵanyna qaramastan, zańsyz áreketterin toqtatpaǵan. Sonyń saldarynan jábirlenýshi únemi úreıde ómir súrip, birneshe ret turǵylyqty mekenjaıyn jáne jumys ornyn aýystyrýǵa májbúr bolǵan, sondaı-aq memlekettik qorǵaý organdaryna qaıta-qaıta júgingen. Іsti qaraý qorytyndysy boıynsha sot er adamdy kináli dep tanyp, 100 saǵat qoǵamdyq jumysqa tartý jazasyn taǵaıyndady. Sonymen qatar jábirlenýshilerge ótemaqy tóleý qoryna mindetti tólem óndirildi, - dep habarlady polıtsııadan.

Eske salaıyq, buǵan deıin Shymkentte stalkıng deregi boıynsha aıyptalǵan azamatqa sot úkimi shyqty.