Almatyda buryn birge turǵan áıeldi bir aı boıy ańdyǵan er adam jazalandy

ALMATY. KAZINFORM — Almatyda buryn birge turǵan áıeldi bir aı boıy júıeli túrde ańdyǵan er adamǵa qatysty sot úkimi shyqty. Ol Qazaqstan Respýblıkasy Qylmystyq kodeksiniń 115-1-baby boıynsha jaýapqa tartyldy.

Tergeý materıaldaryna sáıkes, aıyptalýshy jábirlenýshini ańdyp, qorqytý sıpatynda habarlamalar jibergen, baılanysqa shyǵýǵa májbúrlegen jáne onyń qaýipsizdigine qater tóndirgen. Áıel Túrksib aýdandyq polıtsııa basqarmasyna aryzdanǵannan keıin qylmystyq is qozǵalǵan.

Sot er adamnyń áreketin zańǵa qaıshy dep tanyp, oǵan 100 saǵat kóleminde mindetti qoǵamdyq jumys jazasyn taǵaıyndady.

Túrksib aýdandyq polıtsııa basqarmasynyń bastyǵy Dýman Aýhadıev stalkıng úshin qylmystyq jaýapkershilik qarastyrylǵanyn eske saldy. Vedomstvo ókili turǵyndardy qýdalaý, qorqytý nemese qysym kórsetý faktileri bolǵan jaǵdaıda birden polıtsııaǵa habarlasýǵa úndedi.

— Stalkıng — usaq quqyq buzýshylyq emes, adamnyń ómiri men qaýipsizdigine naqty qaýip tóndiretin áreket. Azamattardy mundaı jaǵdaılarǵa beıjaı qaramaýǵa shaqyramyz. Polıtsııaǵa der kezinde júginý quqyqqa qaıshy áreketterdiń jolyn kesýge jáne óz qaýipsizdigińizdi qorǵaýǵa múmkindik beredi, — dedi ol.

Eske salaıyq, buǵan deıin Almaty oblysynda áıelge birneshe aı boıy stalkıng jasaǵan er adam jazalanǵanyn jazǵan edik.