Almatyda buralqy janýarlardy ustaýǵa 830 mln teńge bólindi
ALMATY. KAZINFORM – Almatyda 2025 jyly 10 myńǵa jýyq qaraýsyz janýar ustalǵan.
Almaty veterınarlyq qyzmetiniń málimetinshe, megapolıste byltyr qańǵybas jáne qaraýsyz qalǵan janýarlardyń sanyn retteý, turǵyndardyń qaýipsizdigin qamtamasyz etý jáne janýarlarǵa jaýapty qaraý qaǵıdattaryn saqtaý maqsatynda júıeli jumystar júrgizilgen. Bul jumystarǵa 19 arnaıy aýlaý brıgadasy, 91 qyzmetker jáne 22 arnaıy jabdyqtalǵan avtokólik jumyldyryldy. Atap aıtqanda, barlyǵy 9 477 ıt jáne 204 mysyq aýlanǵan.
Onyń ishinde AZVQ (aýlaý – zararsyzdandyrý – vaktsınatsııalaý – qaıta jiberý) baǵdarlamasy aıasynda: 1 500 qańǵybas ıt jáne 108 mysyq ýaqytsha ustaý pýnktterinde ustalyp, sterılızatsııadan jáne vaktsınatsııadan ótti. Keıin olar bastapqy ustalǵan aýmaqtaryna qaıta jiberildi.
- Adaptsııa baǵdarlamasy aıasynda 1 660 qańǵybas ıt jańa ıelerine berilip, bul shara janýarlar sanyn izgilik qaǵıdattaryna saı azaıtýǵa múmkindik berdi. Adamdarǵa qaýip tóndirýi múmkin, aýyr dertke shaldyqqan nemese agressııasy joǵary 3 480 qańǵybas ıtke qoldanystaǵy veterınarııalyq-sanıtarııalyq normalarǵa sáıkes jansyzdandyrý sharalary qoldanyldy, - dep habarlady veterınarlyq qyzmet.
Al 2026 jyly Almatyda qańǵybas janýarlardy aýlaý, ýaqytsha ustaý, veterınarııalyq óńdeý jáne halyqtyń qaýipsizdigin qamtamasyz etý boıynsha is-sharalardy júzege asyrýǵa jergilikti bıýdjetten 834,3 mln teńge bólingen.
Jedel veterınarııalyq kómek
2025 jyly Almatyda alǵash ret jedel veterınarııalyq kómek iske qosyldy. Onyń negizgi maqsaty – shuǵyl veterınarlyq kómekti qajet etetin qıyn jaǵdaılarda alǵashqy kómek kórsetip, zardap shekken janýarlardy veterınarlyq klınıkalarǵa tasymaldaý.
Almaty veterınarlyq qyzmetiniń málimetine sáıkes, byltyr jedel veterınarııalyq kómek qyzmetine turǵyndardan jáne uıymdardan 1240 ótinish kelip túsken. Onyń ishinde 750 ótinish jedel tártippen oryndaldy.
- Túsken ótinishter negizinde arnaıy brıgadalar: jol-kólik oqıǵasynan zardap shekken, túrli jaraqat alǵan, aýrý nemese álsiregen, ómirine qaýip tóngen qańǵybas, jabaıy jáne qaraýsyz janýarlarǵa jedel veterınarııalyq kómek kórsetti. Qalǵan ótinishter janýar tabylmaýy, ótinish berýshimen keri baılanys bolmaýy nemese jaǵdaıdyń ózektiligin joǵaltý sebebimen oryndalmady, - delingen jaýapta.
Qazirgi tańda jedel veterınarııalyq kómek qyzmetinde 4 veterınarııalyq mamany bar eki brıgıda qyzmet atqarady. Atalǵan qyzmettiń úzdiksiz jumysyn qamtamasyz etý úshin jergilikti bıýdjetten 11 mln teńge bólingen.
Eske salaıyq, byltyr Almatyda qańǵybas janýarlardy aýlaýǵa 580 mln teńge bólindi.