Almatyda buralqy janýarlardy aýlaý qyzmetiniń parki 16 jańa avtokólikpen tolyqty
ALMATY. KAZINFORM — Almatyda «Qalalyq veterınarlyq qyzmeti» KMK buralqy janýarlardy aýlaý qyzmetiniń materıaldyq-tehnıkalyq bazasy nyǵaıyp jatyr.
Almaty ákimdiginiń málimetinshe, 29 naýryzdan bastap jańa arnaıy tehnıkalar qalanyń barlyq aýdanynda júredi. Avtokólikterdi aýdandarǵa bólý jáne aýlaý brıgadalaryn naqty aýmaqtarǵa bekitý aýdan ákimdikterimen jasasqan memorandýmǵa sáıkes júzege asady.
«Jańa tehnıkany qoldaný aýlaý qyzmeti jumysynyń jedeldigi men tıimdiligin aıtarlyqtaı arttyrýǵa, janýarlardy tasymaldaý jaǵdaıyn jaqsartýǵa, olardyń qaýipsizdigin qamtamasyz etýge jáne adamgershilikpen qaraýǵa múmkindik beredi. Basty maqsat — turǵyndardyń qaýipsizdigin qamtamasyz etý, maldan adamǵa juǵatyn aýrýlardyń aldyn alý, Almaty qalasynyń aýmaǵynda qaraýsyz qalǵan janýarlardyń sanyn azaıtý», — dep habarlady Almaty ákimdiginiń baspasóz qyzmeti.
Eske salaıyq, Almatyda jyl basynan beri 200-ge jýyq buralqy ıttiń aýlanǵanyn habarlaǵanbyz.
