Almatyda Buqar Jyraý kóshesi bir aptaǵa jabylady

ALMATY. KAZINFORM - Almatyda gaz qubyryn aýystyrý jumystaryna baılanysty Buqar Jyraý býlvary bir aptaǵa jabylady.

Almaty ákimdiginen málim etkendeı, 28 qazan saǵat 09:00-den 3 qarasha saǵat 19:00-ge deıin Buqar jyraý býlvary boıynsha Esentaı ózeninen Baızaqov kóshesine deıin bir jolaq jabylady.

«Buqar Jyraý býlvary boıynsha Jarokov kóshesinen Esentaı ózenine deıingi aralyqta ortasha qysymdy jerasty gaz qubyry 1972 jyly paıdalanýǵa berilgen. Onyń jalpy uzyndyǵy – 1766,9 metr. Paıdalaný kezinde oqshaýlaǵysh jabynnyń zaqymdanýy, sondaı-aq qubyrdyń tórt jerinen aqaý anyqtaldy», - dep habarlady ákimdikten.

Jumys aıaqtalǵannan keıin irgeles aýmaqty abattandyrý jáne asfalt tósemdi qalpyna keltirý jumystary júrgiziledi.

Osyǵan deıin aýyl sharýashylyǵy jármeńkesin ótkizýge baılanysty Ýálıhanov kóshesinen Dostyq dańǵylyna deıingi ýchaskedegi Sátbaev kóshesiniń bir bóliginde kólik qozǵalysy shektelgeni týraly jazǵan edik.