Almatyda BRT jelisiniń jalpy uzyndyǵy qansha bolady

ALMATY. KAZINFORM — Ortalyq kommýnıkatsııalar qyzmetiniń kóshpeli baspasóz máslıhatynda qala ákimi Erbolat Dosaev Jeltoqsan kóshesi men Raıymbek dańǵyly boıynsha BRT jobasynyń júzege asyrylý merzimi týraly aıtyp berdi.

Shahar basshysynyń sózinshe, qazirgi eki BRT jelisin salý josparda.

— Jeltoqsan kóshesi boıynsha 4,6 km jáne Raıymbek dańǵyly boıynsha 17,2 km. Úderisterdi ońtaılandyrý úshin Raıymbek dańǵyly boıynsha joba eki kezeńge bólindi. Biz birinshi kezeń jumystaryna kúzde kirise alatyn edik, biraq sarapshylar qaýymdastyǵymen talqylaýlardan keıin jáne qala turǵyndaryna qolaısyzdyqty azaıtý maqsatynda eki kezeń boıynsha jumystardy birden bastaý týraly sheshim qabyldandy, — dep atap ótti Erbolat Dosaev.

2025 jyldyń qańtarynda Raıymbek dańǵylynyń eki ýchaskesi boıynsha merdiger uıymdy tańdaý baıqaýy jarııalanady. Qurylys-montaj jumystary kelesi jyldyń naýryz aıynda bastalady.

Qala ákimi osy ýaqytta Jeltoqsan kóshesi boıynsha BRT jobasynyń júzege asyrylýy bastalatynyn da jetkizdi.

— Biz jolaqtardy taryltyp, qoǵamdyq kólikke arnalǵan qosymsha jolaq úshin oryn bosatýdy josparlap otyrmyz. Joba Raıymbek dańǵylyndaǵydaı ınjenerlik ınfraqurylymdy aýystyrý jumystarymen júzege asyrylady. 2025 jyldyń sońyna deıin eki jelini de aıaqtaýdy josparlap otyrmyz, — dedi ol.

Osylaısha, Almatyda qazirgi qoldanysta BRT jelisin qosqanda jalpy uzyndyǵy 30,5 km bolady.

Osyǵan deıin Erbolat Dosaev keler jyly 35 shaqyrym jańa jol salynatyny týraly aıtqan edi.