Almatyda birinshi synyp oqýshysynyń zorlanýy: anasy saraptama qortyndysymen kelispeıdi
Almatyda jekemenshik mektepte 7 jastaǵy oqýshynyń zorlanýyna qatysty balanyń anasy taǵy bir málimdeme jasady. Ol elimizdiń Іshki ister mınıstri men Bas prokýroryna júgindi, dep habarlaıdy Kazinform.
«Men – 1 synypqa barǵan boıda bir aptadan keıin Almatydaǵy halyqaralyq mektepte zorlyq kórgen balanyń anasymyn. Bir aıdan asa ýaqyt ótti, qylmysker áli tabylǵan joq. Sebebi nede? Tergeý nashar jumys istep jatyr ma, álde halyqaralyq mektep bizdiń elimizdiń zańdaryna baǵynbaı ma?», - dep surady almatylyq áıel.
Aıtýynsha, psıhologter balasyn psıhıatrlarǵa kórsetýge keńes bergen.
«QR Іshki ister mınıstri Erjan Sádenovke, bas prokýror Berik Asylovqa júginemin. Men memlekettik organdarǵa jazǵan saýalyma áli jaýap ala almaǵandyqtan, bul ótinishti ózderińizge joldaýǵa májbúrmin», - deıdi balanyń anasy.
Sonymen qatar ol qylmystyq is boıynsha júrgizilgen saraptama qorytyndysymen tanys ekenin jetikizdi.
«Ulymnyń denesinde jaralar men tyrtyqtar boldy. Bul dıagnozdy balalar proktology qoıǵan. Endi sol jaralar qurt pen ish qatýdan bolǵan zaqym depti. Balamnyń shalbaryn da qurt jyrtyp tastaǵan bolyp tur ǵoı. Men qarapaıym qazaqstandyqpyn, joǵarǵy jaqta tanystarym joq. Shynynda da ádil tergeý bolmaı ma?» - dedi balanyń anasy.
Almaty qalalyq Polıtsııa departamentiniń baspasóz qyzmeti bul derek boıynsha qylmystyq isti tergeý basqarmasy Qylmystyq kodekstiń 121-baby, 3-1-bóligi boıynsha tergep jatqanyn habarlady.
«Komıssııalyq sot-medıtsınalyq saraptama júrgizildi. Onyń qorytyndysy alyndy. Sonymen qatar, istiń obektıv mán-jaılaryn anyqtaý maqsatynda tergeý qosymsha saraptamalyq zertteý taǵaıyndady. Alaıda azamatsha P. ulyna saraptama jasaǵysy kelmeýine baılanysty júrgizý múmkin bolmady. Sotaldy tergeý ІІM men PD basshylyǵynyń baqylaýynda», - dep atap ótti vedomstvodan.
Buǵan deıin Almaty turǵyny 1-synyptaǵy balasynyń zorlanǵany týraly málimdeme jasaǵan bolatyn.
Keıin Almaty qalalyq Polıtsııa departamenti bastyǵynyń birinshi orynbasary Nurlan Almasbekov atalǵan derek Bostandyq aýdany polıtsııa basqarmasynda QR QK-niń 121-baby 3-bóligi boıynsha tirkelgenin jáne birqatar saraptama taǵaıyndalǵanyn aıtqan edi.
