Almatyda birneshe kóshede birjaqty qozǵalys engiziledi
ALMATY. KAZINFORM — Almatyda qoǵamdyq kólikke arnalǵan arnaıy jolaqtar jelisin keńeıtý, velojoldardyń uzyndyǵyn shamamen 40 shaqyrymǵa arttyrý jáne birqatar kóshede qozǵalys syzbasyn ózgertý josparlanyp otyr. Bul týraly Almaty jolaýshylar kóligi jáne avtomobıl joldary basqarmasynyń basshysy Erjan Dıhanbaev aıtty.
Erjan Dıhanbaevtyń sózinshe, kólik júıesin jańǵyrtý aıasynda Almatyda ál-Farabı dańǵylynda, Tilendıev, Shevchenko, Qurmanǵazy, Sátbaev, Ótegen batyr, Rysqulov kóshelerinde, sondaı-aq Shyǵys aınalma avtomobıl jolynda (ShAAJ) jáne Soltústik aınalymda jańa avtobýs jolaqtaryn salý qarastyrylyp jatyr.
Sonymen qatar 2026 jyly velojoldardyń jalpy uzyndyǵyn 87 shaqyrymnan 125,5 shaqyrymǵa deıin, ıaǵnı shamamen 40 shaqyrymǵa ulǵaıtý josparlanǵan.
Budan bólek, ákimdik birqatar kóshede birjaqty qozǵalys engizý jáne qozǵalys syzbasyn iri bıýdjet shyǵyndarynsyz — negizinen jańa jol tańbalary men qozǵalysty uıymdastyrýdy ońtaılandyrý arqyly ózgertý múmkindigin qarastyryp jatyr.
Atap aıtqanda, ózgerister «Tastaq» bazary mańyndaǵy Brýsılovskıı, Túrkebaev, Qarasaı batyr, Qulymbetov jáne Prokofev kóshelerin, sondaı-aq Áýezov — Baızaqov, Jýkov — Ýálıhanov jáne Radostovets kósheleriniń ýchaskelerin qamtıdy. Sonymen qatar mamandar Tımırıazev, Jandosov, Manas, Myńbaev, Beregovaıa, Armıanskaıa, Aımanov jáne Pýshkın kóshelerinde birjaqty qozǵalys engizý múmkindigin pysyqtap jatyr.
— Biz áýeli jańa jol tańbalary men ýaqytsha qozǵalys syzbalary arqyly pılottyq sheshimderdi synaqtan ótkizip, oń nátıje bolǵan jaǵdaıda olardy keńinen engizý tásilin belsendi qoldanyp kelemiz. Bul úlken shyǵynsyz ári ıkemdi túrde jol qozǵalysyn jaqsartýǵa múmkindik beredi. Jańa qozǵalys syzbalary kóshelerdiń ótkizý qabiletin 20-25% arttyryp, jol-kólik oqıǵalaryn 35%-ǵa deıin azaıtýǵa jáne qalanyń negizgi kólik toraptaryna túsetin júktemeni tómendetýge múmkindik beredi, — dedi Erjan Dıhanbaev Almaty óńirlik kommýnıkatsııalar qyzmetinde ótken baspasóz konferentsııasynda.
Eske salaıyq, buǵan deıin Almatyda 2026 jyly 250 shaqyrym jol jóndeletinin jazǵanbyz.
