Almatyda birneshe kóshe eki aıǵa jabylady
ALMATY. KAZINFORM – Almatynyń eki aýdanynda 42 jyl buryn paıdalanýǵa berilgen qubyr qaıta jańǵyrtylady.
– 31 mamyrdan 20 shildege deıin Almaly aýdanynda Bógenbaı batyr kóshesiniń Brýno kóshesinen Anosov kóshesine deıingi bóliginde eki baǵytta da kólik qozǵalysy shekteledi. Sondaı-aq 31 mamyrdan 30 maýsymǵa deıin Túrksib aýdanynda Kotelnıkov kóshesiniń Seıfýllın dańǵylynan Aqan Seri kóshesine deıingi bóliginde de eki baǵytta da jol jabylady, - dep habarlady «Almaty jylý jelileri» kompanııasynan.
Shekteýler atalǵan kóshelerde joldyń astynan ótetin magıstraldyq qubyrlardy qaıta jańartý jumystarynyń qaýipsizdigin qamtamasyz etý maqsatynda engiziledi.
– Almaly jáne Túrksib aýdanynda bıyl jalpy uzyndyǵy 3 shaqyrym bolatyn, 1983-1985 jyldary paıdalanýǵa berilgen jylý jelileri jańartylady. Bul 105 kópqabatty turǵyn úıdi, 5 jeke úıdi, 1 mektep pen 3 ózge de nysandy qys mezgilinde turaqty jylýmen qamtamasyz etýge múmkindik beredi, - dep atap ótti kompanııadan.
Sonymen qatar qaıta jańǵyrtý jumystary kezinde turǵyndarǵa ystyq sý úzdiksiz beriledi.
Jalpy, bıyl qala boıynsha 39 shaqyrym jylý jelisin qaıta jańartý josparlanǵan. Bul jelilerdiń tozý deńgeıin 54%-ǵa deıin tómendetýge múmkindik beredi.
Osyǵan deıin 30 mamyrdan bastap 15 tamyzǵa deıin Buqar Jyraý jelekjolynda Baıtursynov kóshesinen bastap S.Markov kóshesine deıin soltústik jaǵynan avtokólik qozǵalysy shekteletini týraly jazǵan edik.
