Almatyda birneshe kóshe bir aptaǵa ýaqytsha jabylady
ALMATY. KAZINFORM – Almatyda Rozybakıev pen Baıqadamov kósheleriniń qıylysynda qubyr aýystyrý úshin kólik qozǵalysy ýaqytsha shekteledi.
«Almaty jylý júıesi» JShS málimetinshe, aldaǵy jylytý maýsymyna daıyndyq barysynda Bostandyq aýdanynda 1984 jyly paıdalanýǵa berilgen jalpy uzyndyǵy 1,2 shaqyrymdyq jylý magıstrali aýystyrylady. Osyǵan baılanysty 16 tamyzdan 27 tamyzǵa deıin Rozybakıev pen Baıqadamov kósheleriniń qıylysynda avtokólik qozǵalysy ýaqytsha toqtatylady.
Bul jylý magıstrali 97 kóppáterli turǵyn úıdi, 12 jeke turǵyn úıdi, 4 balabaqshany, 2 aýrýhanany jáne 27 ózge de nysandy jylý energııasymen jáne ystyq sýmen qamtamasyz etedi.
Odan bólek 15 tamyzda saǵat 08:00-den 17 tamyzda saǵat 19:00-ge deıin Almatyda Baızaqov kóshesinde Raıymbek dańǵylynan eki baǵytta da kólik qozǵalysy shekteldi. Munda 1966 jyly paıdalanýǵa berilgen magıstraldyq qubyr jóndeledi.
Sonymen qatar Almaly aýdanynda 1980 jyly paıdalanýǵa berilgen uzyndyǵy 130 metr jylý trassasy aýystyrylady. Osyǵan baılanysty 2025 jylǵy 15 tamyzdyń saǵat 23:00 bastap 18 tamyzdyń saǵat 07:00 deıin Jambyl kóshesi Isaev kóshesinen bastap Baıǵanın kóshesine deıin jabyldy.
Eske salaıyq, buǵan deıin Almaty áýejaıyndaǵy joldardyń biri ýaqytsha jabylatynyn jazǵanbyz.