Almatyda birneshe kommertsııalyq nysan buzyldy
ALMATY. KAZINFORM – Sot sheshimi boıynsha qoǵamdyq tamaqtaný oryndary men dúken buzyldy. Almatynyń qala qurylysyn baqylaý basqarmasynyń málimetinshe, Túrkebaev kóshesi, 88 úıde ornalasqan ǵımaratty jospardan tys tekserý kezinde basqarma qosalqy nysannyń ruqsatsyz salynǵanyn anyqtady.
Menshik ıesine qatysty jol bergen buzýshylyqtardy joıýǵa nusqama bere otyryp, QR ÁQBtK 316-baby 1-baby, 321-baby, 323-baby boıynsha shara qabyldandy.
«2023 jyldyń 18 mamyrynda Almaty qalalyq mamandandyrylǵan ekonomıkalyq sotyna buzý týraly talap qoıyldy, ony sot qanaǵattandyrdy. Keıin menshik ıesi apellıatsııalyq shaǵym berdi, alaıda birinshi satydaǵy sottyń sheshimi Almaty qalalyq sotynyń 2023 jylǵy 17 qazandaǵy qaýlysymen ózgerisiz qaldy», - dep habarlady basqarmadan.
Búgin nysan sot oryndaýshylarynyń qatysýymen buzyldy.
Buǵan deıin Almaty ákimi Erbolat Dosaev zańsyz qurylysty baqylaýdy kúsheıtýdi tapsyrǵan bolatyn.
Jalpy, qala boıynsha jyl basynan beri 28 zańsyz nysan, onyń ishinde bıznes-ortalyqtar, meıramhanalar, qosalqy nysandar men avtoservıster, sondaı-aq «Mechta» jáne KHAN sııaqty iri turǵyn úı keshenderi buzyldy.