Almatyda birneshe avtobýs parki jáne trolleıbýs parki jańartylady
ALMATY. KAZINFORM – Almaty qalasynyń ákimi Darhan Satybaldy qalanyń kommýnaldyq avtobýs jáne trolleıbýs parkterin aralap, olardyń tehnıkalyq jaǵdaıy men qoǵamdyq kóliktiń qyzmet kórsetý sapasyn tekserdi.
Almaty ákimdiginiń málimetinshe, «Almatyelektrotrans» kásiporny 5 avtobýs parkine, 1 trolleıbýs parkine jáne mektep avtobýstary parkine ıelik etedi. Qazirgi tańda Almaty qalasynda 2 435 qoǵamdyq kólik bar.
Trolleıbýs parki Almaly aýdanynda jalpy aýdany 4,2 gektar aýmaqta ornalasqan. Qazirgi tańda munda 212 jańa trolleıbýs qyzmet kórsetedi. Kúnine qoǵamdyq kóliktiń bul túrimen 130 myń jolaýshy qatynaıdy.
Park ınfraqurylymy jańartýdy qajet etedi. Jóndeý aımaǵy, qoımalar men dıspetcherlik ǵımarattar 1960 jyldary salynǵan jáne osy ýaqytqa deıin kúrdeli jóndeýden ótpegen. Osyǵan baılanysty, qala ákimi Almatydaǵy jalǵyz trolleıbýs parkiniń jobalyq-smetalyq qujattamasyn ázirleýdi tapsyrdy.
Odan bólek Túrksib aýdanyndaǵy №1 avtobýs parkinde qazirgi tańda 300 gazben júretin avtobýs qyzmet kórsetip jatyr. Kelesi jyldyń sońyna deıin bul parkte jańa jýý keshenin salý, ınjenerlik jelilerdi tolyq jańartý, sondaı-aq jeke ınvestıtsııalar esebinen jańa gaz quıý stantsııasyn (AGNKS) iske qosý josparlanyp otyr. Al osy aýdanda ornalasqan №2 avtobýs parkinde 320 avtobýs tirkelgen. Bıyl bul jerde gaz quıý stantsııasy men júrgizýshiler jataqhanasyna jóndeý jumystary júrgizilmek.
Sonymen qatar qala aýmaǵynda 8 gaz quıý stantsııasy jumys isteıdi, alaıda olardyń keıbiri jańǵyrtýdy qajet etedi. Almaty ákimi avtobýstarǵa janarmaı quıý ınfraqurylymyn damytý jáne qosymsha avtoparkter salý týraly pikir bildirdi.
- Avtobýs marshrýttaryn avtoparkterge durys bólý kerek. ıAǵnı, kólik óz baǵytyna alys jerden bos júrip barmaýǵa tıis. Sondaı-aq biz qalanyń batys jáne shyǵys bólikterinde, ásirese Naýryzbaı aýdanynda, bolashaq polıtsentrler aıasynda avtoparkterge arnalǵan jer telimderin aldyn ala qarastyrýymyz qajet, – dedi Darhan Satybaldy.
Almaty ákimi Qalalyq josparlaý basqarmasyna jańa avtoparkter úshin jer telimderin anyqtaýdy, al quzyrly basqarmalarǵa — jobalyq-smetalyq qujattamany jedel túrde ázirleýdi tapsyrdy.
Eske salaıyq, buǵan deıin Almatydaǵy Abaı dańǵyly Úlken Almaty aınalma avtomobıl jolyna deıin qashan uzartylatynyn jazǵanbyz.
