Almatyda birqatar kórnekti tulǵanyń murasyna arnalǵan kórme ashyldy
ALMATY. KAZINFORM — QR Ulttyq kitaphanasynda bıyl mereıtoıy atalyp ótetin memleket jáne qoǵam qaıratkerleri, ádebıet pen óner salasynyń 16 kórnekti ókiline arnalǵan kórme ashyldy. Bul týraly Mádenıet jáne aqparat mınıstrligi habarlady.
Olardyń qatarynda Jambyl Jabaev, Álıhan Bókeıhanov, Ahmet Jubanov, Saıyn Muratbekov jáne ózge de tulǵalar bar.
— Kórme ekspozıtsııasyna 350-den astam baspa basylymy men 200-ge jýyq elektrondy materıal qoıyldy. Kitaphanaǵa kelýshiler mereıtoı ıeleriniń ómirbaıany, kásibı jáne qoǵamdyq qyzmeti jónindegi málimettermen tanysa alady. Mádenıet qaıratkerlerine jeke bólim arnalyp, olardyń teatr, kıno jáne mýzyka ónerin damytýǵa qosqan úlesi tanystyryldy, — delingen aqparatta.
Ulttyq kitaphananyń oqyrmandary kórmeni jyl boıy tamashalaı alady.
Aıta keteıik, QR Saýda jáne ıntegratsııa mınıstri Arman Shaqqalıev Berlındegi Grüne Woche kórmesinde Qazaqstannyń Ulttyq pavılonyn ashty.
Sondaı-aq Bett UK 2026 halyqaralyq kórmesinde Qazaqstannyń ulttyq pavılony tanystyryldy.