Almatyda birqatar kandıdat máslıhat saılaýynan shettetildi

ALMATY. KAZINFORM — Almaty qalasy aýmaqtyq saılaý komıssııasy máslıhat depýtattyǵyna saılaýǵa túspek bolǵan birneshe kandıdat tirkeýiniń kúshin joıdy.

Almatyda birqatar kandıdat máslıhat saılaýynan shettetildi
Foto: Astana qalasynyń ákimdigi

Tıisti habarlamalar Almaty ákimdiginiń resmı saıtynda jarııalandy. Atap aıtqanda, № 13 birmandatty aýmaqtyq saılaý okrýgi boıynsha aımaqtyq saılaý komıssııasy eki kandıdattyń — «Reprodýktıvti medıtsına ınstıtýty» JShS koll-ortalyǵynyń basshysy Aınara Nurdın men birneshe uıymda basshylyq qyzmet atqaratyn Bıbek Júnisovtiń tirkeýi alynyp tastalǵan.

Sonymen qatar 17 qarashada № 8 okrýg boıynsha aımaqtyq saılaý komıssııasy depýtattyqqa ózin usynǵan «Jasyl Almaty» KMM saıabaqtardy kútip-ustaý bóliminiń bastyǵy Samat Saǵymbekov tirkeýiniń kúshin joıdy. Jalpy qarasha aıynyń basynan beri Almatyda máslıhat saılaýyna qatyspaq bolǵan 17 kandıdattyń tirkeýi toqtatyldy.

Buǵan deıin № 12 saılaý okrýgi boıynsha «Sen úshin — Radı tebıa» qoǵamdyq qorynyń prezıdenti jáne «Halyqaralyq quqyqtyq alıans» JShS bas dırektory Elmıra Taýbaeva tirkeýiniń kúshi joıylǵan bolatyn. № 5 okrýg boıynsha Qazaqstan tutynýshylarynyń ulttyq lıgasynyń prezıdenti Svetlana Romanovskaıanyń tirkeýi joıyldy.

Odan bólek № 1 okrýg boıynsha «NURKENT SAUDA» JShS dırektory Ernar Bıikovtiń, № 3 okrýg boıynsha № 29 qalalyq emhananyń býhgalteri Aızada Muhambetqalıdiń, № 4 okrýg boıynsha «FIRST» kásibı býhgalterler uıymy keńesiniń tóraǵasy Sholpan Bertisbaevanyń tirkeýi kúshinen joıyldy.

№ 5 okrýg boıynsha «Pactum Verny zań kompanııasy» JShS zańger assıstenti Dıas Tilebalǵanovtyń, № 6 okrýg boıynsha qalalyq jedel medıtsınalyq járdem qyzmetiniń dırektory Arman Toıbekovtiń, № 10 okrýg boıynsha «Han Táńiri TK» MIB tóraǵasy Talǵat Sholanovtyń tirkeýi joıyldy.

Dál osyndaı sheshimder № 15 okrýg boıynsha «QAǴAZ INVESTMENTS» AQ bas dırektory Serik Shyntasovqa jáne № 16 okrýg boıynsha «SK Prom Indýstrııa» JShS dırektory Qýat Beısembaevqa qatysty qabyldandy.

Tirkeýdiń kúshinen joıylýy eń kóp № 21 saılaý okrýginde tirkeldi. Munda saılaý dodasynan birden tórt kandıdat shyǵyp qaldy: Sábıt Moldaǵalıev, Stanıslav Ábilev, Elena Sergeeva jáne Dmıtrıı Laktıýshın.

Jarııalanǵan habarlamalarǵa sáıkes, kandıdattardyń tirkeýin kúshinen joıýǵa «Qazaqstan Respýblıkasyndaǵy saılaý týraly» Qazaqstan Respýblıkasy Konstıtýtsııalyq zańynyń 104-baby 6-1-tarmaǵynyń 3 jáne 4 tarmaqshalarynyń erejeleri negiz bolǵan.

Eske salaıyq, buǵan deıin Almatyda máslıhat saılaýyna 201 kandıdat tirkelgenin jazǵanbyz. Birmandattyq aýmaqtyq saılaý okrýgteri boıynsha máslıhat depýtattyǵyna 82 kandıdat tirkelgen. Al 6 saıası partııa quramynda 119 kandıdat bar partııalyq tizimdi usynǵan.

29 qarashada ótetin máslıhat saılaýyn uıymdastyrýǵa jáne ótkizýge 35,8 mlrd teńge qarastyryldy. Bul týraly OSK múshesi Mıhaıl Bortnık málimdedi.